ড০ বি আৰ আম্বেদকাৰৰ জন্ম বাৰ্ষিকী উদযাপন কৰাৰ ‘অপৰাধ’ত মহাৰাষ্ট্ৰত হত্যা কৰা হৈছে এগৰাকী ২৪ বছৰীয়া দলিত যুৱকক। এই হত্যাকাণ্ডৰ অভিযোগত মহাৰাষ্ট্ৰ আৰক্ষীয়ে ৭ গৰাকী লোকক গ্ৰেপ্তাৰ কৰে। দুদিন পূৰ্বে এই ঘটনা সংঘটিত হৈছিল মহাৰাষ্ট্ৰৰ নন্দদ জিলাৰ বোন্দাৰ হাভেলী গাঁৱত।
প্ৰকাশিত বাতৰি অনুসৰি নিহত লোকজনৰ নাম অক্ষয় ভালেৰাও। এগৰাকী আৰক্ষী বিষয়াই জানিবলৈ দিয়া মতে, বৃহস্পতিবাৰে সন্ধিয়া উচ্চ বৰ্ণ সম্প্ৰদায়ৰ এগৰাকী ব্যক্তিৰ বিয়া উদযাপনৰ সময়ত সেই স্থানেৰে পাৰ হৈ গৈছিল ভালেৰাও আৰু তেওঁৰ ভাতৃ।
তেনে সময়তে একাংশ লোকে তৰোৱাল লৈ তেওঁলোকক আগভেটি ধৰে। অভিযুক্ত লোকসকলে ভালেৰাও আৰু তেওঁৰ ভাতৃ আকাশক দেখাৰ পিছতে গাঁওখনত যোৱা ১৪ এপ্ৰিলত ভীম জয়ন্তী পালন কৰাৰ বাবে এই লোকসকলক হত্যা কৰা উচিত বুলি মন্তব্য কৰে।
ইয়াৰ পিছতে ক্ৰমাৎ পৰিস্থিতি উত্তপ্ত হৈ পৰে আৰু অক্ষয় ভালেৰাওক মাৰপিট কৰি ছুৰীৰে আঘাত কৰি হত্যা কৰা হয় বুলি আৰক্ষী বিষয়াগৰাকীয়ে জানিবলৈ দিয়ে। অক্ষয়ৰ লগতে তেওঁৰ ভাতৃ আকাশকো অভিযুক্তই মাৰপিট কৰে বুলি আৰক্ষীয়ে জানিবলৈ দিয়ে।
আক্ৰমণত অক্ষয় ভালেৰাও গুৰুতৰভাৱে আহত হয়। তেওঁক কাষৰীয়া চিকিৎসালয়লৈ লৈ যোৱা হয় যদিও চিকিৎসালয়ত তেওঁক মৃত ঘোষণা কৰা হয়।
এই হত্যাকাণ্ডৰ অভিযোগত ভাৰতীয় দণ্ডবিধিৰ অধীনত হত্যা, হত্যাৰ চেষ্টা, হিংসাত্মক কাণ্ড আৰু আক্ৰমণৰ লগতে অনুসূচিত জাতি আৰু অনুসূচিত জনজাতি (অত্যাচাৰ প্ৰতিৰোধ) আইনৰ অধীনত এফআইআৰ ৰুজু কৰি ৭ অভিযুক্তক গ্ৰেপ্তাৰ কৰা বুলি বিষয়াগৰাকীয়ে জানিবলৈ দিয়ে।
