আজি দেশৰ ৰাজধানী নতুন দিল্লীৰ বিধানসভা নিৰ্বাচনৰ ভোটগ্ৰহণ। অহা ৮ ফেব্ৰুৱাৰীত ঘোষণা কৰা হ’ব ফলাফল।
এইবাৰ দিল্লীৰ বিধানসভা নিৰ্বাচনত মুঠ ৬৯৯ গৰাকী প্ৰাৰ্থীয়ে ৭০ খন আসনত প্ৰতিদ্বন্দ্বিতা কৰিছে। যদিও এই নির্বাচনত তিনি কোণীয়া প্রতিদ্বন্দ্বিতা হ’ব, তথাপিও মূল যুঁজখন হ’ব আপ আৰু বিজেপিৰ মাজত৷ অৱশ্যে কংগ্ৰেছ বহু পিছ পৰি থকা নাই।
দিল্লী বিধানসভা নিৰ্বাচনক লৈ ৰাজনৈতিক মহলত তীব্ৰ উত্তেজনাৰ সৃষ্টি হৈছে। আপক পৰাস্ত কৰি ক্ষমতা দখল কৰাৰ সপোন দেখিছে ভাৰতীয় জনতা পাৰ্টিয়ে।
আনহাতে, পুনৰ চৰকাৰ গঠন কৰাটো কেজৰিৱালৰ বাবেও এক প্ৰত্যাহ্বান। আজি দিল্লীৰ ১.৫৬ কোটি ভোটাৰে ভোটদান কৰিব। ইয়াৰে পুৰুষ ভোটাৰৰ সংখ্যা ৮৩.৭৬ লাখ, মহিলা ভোটাৰৰ সংখ্যা ৭২.৩৬ লাখ আৰু তৃতীয় লিংগৰ ভোটাৰৰ সংখ্যা ১২৬৭ জন।
মুঠ ১৩,৭৬৬ টা ভোটকেন্দ্ৰত ভোটগ্ৰহণ অনুষ্ঠিত হ’ব। ইয়াৰে ৭৩৩টা ভোটকেন্দ্ৰত বিশেষ ক্ষমতাসম্পন্ন লোকৰ ভোটদানৰ ব্যৱস্থা কৰা হৈছে।
বিধানসভা নিৰ্বাচনৰ পূৰ্বে দিল্লীত নিৰাপত্তা সুনিশ্চিত কৰাৰ বাবে নিৰ্বাচন আয়োগে কঠোৰ পৰিশ্ৰম কৰিছে। অৰ্ধসামৰিক বাহিনীৰ ২২০টা কোম্পানী, ১৯ হাজাৰ হোমগাৰ্ড আৰু ৩৫ হাজাৰৰো অধিক দিল্লী আৰক্ষী নিয়োগ কৰা হৈছে।
নিৰ্বাচন আয়োগৰ ৱেবছাইট অনুসৰি ৩৯ জন সাধাৰণ পৰ্যবেক্ষক নিযুক্তি দিয়া হৈছে। ১১ জন আৰক্ষী পৰ্যবেক্ষক থাকিব। গণনা কৰা পৰ্যবেক্ষক আছে ৭০ জন।
এইবাৰৰ দিল্লী বিধানসভা নিৰ্বাচন আম আদমী পাৰ্টিৰ বাবে এক ডাঙৰ প্ৰত্যাহ্বান। বিশেষকৈ দিল্লীৰ আবকাৰী দুৰ্নীতিৰ গোচৰত তদানীন্তন মুখ্যমন্ত্ৰী তথা দলৰ সৰ্বোচ্চমন্ত্ৰী অৰবিন্দ কেজৰিৱালক গ্ৰেপ্তাৰ কৰাৰ পিছত এই নিৰ্বাচন আম আদমী পাৰ্টিৰ বাবে কঠিন হৈ পৰিছে।
উল্লেখ্য যে ২০২০ চনৰ দিল্লী বিধানসভা নিৰ্বাচনত আম আদমী পাৰ্টিয়ে ৬২ খন আসন আৰু বিজেপিয়ে ৮ খন আসন লাভ কৰিছিল।
