দিল্লীৰ এক্সিট প’লে শলঠেকত পেলাইছে আপক! বিজেপিয়ে চৰকাৰ গঠন কৰাৰ সম্ভাৱনা ব্যক্ত
অধিকাংশ এক্সিট প’লে ইংগিত দিয়ে যে অৰবিন্দ কেজৰিৱালৰ আম আদমী পাৰ্টিক পৰাস্ত কৰি বিজেপিয়ে দিল্লীত ক্ষমতালৈ আহিবলৈ সাজু হৈছে। কিন্তু মঙলবাৰে চূড়ান্ত ফলাফল ঘোষণা নোহোৱালৈকে আপে হাৰ মানিবলৈ অনিচ্ছুক। তিনিমাহ পূৰ্বে চুবুৰীয়া ৰাষ্ট্ৰ হাৰিয়ানাত অনুষ্ঠিত হোৱা বিধানসভা নিৰ্বাচনৰ এক্সিট প’লৰ ফলাফললৈ আঙুলিয়াই দি দলৰ নেতাসকলে দাবী কৰে যে ‘এক্সিট প’ল’ আচলতে ‘সঠিক’ ফলাফল নহয়।
ভাৰতৰ নিৰ্বাচনৰ ইতিহাসে দেখুৱাইছে যে এক্সিট প’লৰ প্ৰকৃত ফলাফলৰ লগত প্ৰায়ে মিল নাথাকে। অৱশ্যে ফলাফলৰ মিল থকা উদাহৰণো আছে। আমি অহা শনিবাৰে (৮ ফেব্ৰুৱাৰী) গণনাৰ দিনলৈ অপেক্ষা কৰিব লাগিব প্ৰকৃত ফলাফল জানিবলৈ। বুধবাৰে অৱশ্যে সকলো যুঁজাৰু দলে জয়ৰ দাবী কৰে।
দিল্লীৰ ৭০খন বিধানসভাৰ আসনৰ বাবে বুধবাৰে ভোটগ্ৰহণ অনুষ্ঠিত হয়। তাত নিৰপেক্ষ সংখ্যাগৰিষ্ঠতাৰ বাবে ‘মেজিক নম্বৰ’ ৩৬। বিভিন্ন প্ৰতিষ্ঠানে সন্ধিয়া বুথ ৰিটাৰ্ণ জৰীপৰ ফলাফল প্ৰকাশ কৰে। বেছিভাগ সমীক্ষাই ইংগিত দিয়ে যে কেজৰিৱালে জয়ৰ হেট্ৰিক অৰ্জন কৰিবলৈ সক্ষম নহ’ব। বেছিভাগ সমীক্ষাতে বিজেপিক ৩৫ৰ পৰা ৫০খন আসন দিয়া হৈছে।
২০২০ চনৰ বিধানসভা নিৰ্বাচনত আপে প্ৰায় ৫৩.৫ শতাংশ ভোট লাভ কৰি ৬২খন আসনত জয়লাভ কৰিছিল। বিজেপিয়ে ৮ খন আসনত জয়লাভ কৰে। বিজেপিয়ে ৩৮.৫ শতাংশ ভোট লাভ কৰে। কংগ্ৰেছে মাত্ৰ ৪.২৬ শতাংশ ভোট লাভ কৰিছিল। এইবাৰো কংগ্ৰেছে খাটা খুলিব পাৰিব নে নাই সেয়া স্পষ্ট হোৱা নাই।