ঐতিহাসিকভাবে গুৰুত্বপূৰ্ণ মৰঙীক এটা স্বতন্ত্ৰ সমষ্টিৰ মৰ্যাদা দিবলৈ চৰকাৰ তথা নিৰ্বাচন আয়োগক বৃহস্পতিবাৰে অনুষ্ঠিত এক ৰাজহুৱা সভাই আহ্বান জনায়৷ মৰঙী উন্নয়ন খণ্ডৰ প্ৰেক্ষাগৃহত অনুষ্ঠিত সমাজকৰ্মী ইমৰান হুছেইনৰ সঞ্চালনাত আৰু মৰঙী প্ৰেছ ক্লাবৰ সভাপতি তথা জ্যেষ্ঠ সাংবাদিক হেমন্ত শইকীয়াই আঁতধৰা সভাখনত কছাৰী আৰু আহোমৰ ইতিহাসত আলোকপাত কৰে সমাজকৰ্মী মুনিন বৰদলৈয়ে৷
মৰঙী ৰাজহ চক্ৰই সামৰি লোৱা অঞ্চলৰ জনগাঁথনি আৰু ভোটাৰৰ তথ্য দাঙি ধৰি বক্তব্য ৰাখে সমাজকৰ্মী তথা শ্ৰমিক নেতা ধ্ৰুৱজ্যোতি বৰাই৷ তেওঁ কয় যে নতুনকৈ সীমা নিৰ্দ্ধাৰিত খুমটাই সমষ্টিত গোলাঘাট চেণ্ট্ৰেল ডেভেলপমেণ্ট ব্লক, দক্ষিণ হেঙ্গেৰা, গুৰযোগনীয়া, শেনচোৱা আদি বিভিন্ন ঠাই অন্তৰ্ভুক্ত কৰা হৈছে যদিও প্ৰস্তাৱিত সমষ্টিটোৰ কেৱল মৰঙী ৰাজহ চক্ৰৰে প্ৰায় ৫৪ শতাংশ ভোটাৰ৷
প্ৰস্তাৱিত নতুন খুমটাই সমষ্টিৰ মৰঙীৰ ৭১৯৩১ ভোটাৰৰ বিপৰীতে বাকী খুমটাইৰ সকলো অঞ্চলৰ মুঠ ভোটাৰৰ সংখ্যা ৬১৮০৬ জন ৷ সভাৰ অন্তত গৃহীত প্ৰস্তাৱত উল্লেখ কৰা হৈছে যে তৎকালীনভাবে মৰঙিক স্বতন্ত্ৰ সমষ্টিৰূপে স্বীকৃতি দিবলৈ কাৰিকৰী অসুবিধা হয়তো আহি পৰিব৷ কিন্তু পৰবৰ্তী সমষ্টি পুনৰ্নিৰ্দ্ধাৰণলৈকে প্ৰস্তাৱিত খুমটাই সমষ্টিক মৰঙী-খুমটাই হিচাপে নতুনকৈ নামকৰণৰ কৰিবলৈ আহ্বান জনায়৷
এই ৰাজহুৱা সভাতে মানস বৰদলৈক সভাপতি, হেমন্ত শইকীয়াক কাৰ্যকৰী সভাপতি, ধ্ৰুৱজ্যোতি বৰাক সাধাৰণ সম্পাদক আৰু ৰাণাজিৎ হাজৰিকাক সম্পাদক হিচাপে লৈ মৰঙী স্বতন্ত্ৰ বিধানসভা সমষ্টি দাবী সমিতি নামেৰে এখন সমিতি গঠন কৰিও অনাগত সময়ত মৰঙী নামেৰে এটা বিধানসভা সমষ্টি গঠনৰ বিষয়টো আগবঢ়াই লৈ যাবলৈ । সেয়ে পৰবৰ্তী সময়ত মৰঙিক এক সুকীয়া বিধান সভা সমষ্টি গঠনৰ দাবী জনোৱাৰ লগতে প্ৰস্তাৱিত সমষ্টি পুনৰনিৰ্ধাৰণত কেৱল খুমটাই সমষ্টিৰ পৰিবৰ্তে মৰঙী-খুমটাই বিধান সভা সমষ্টি নামাকৰণৰ বাবে ভাৰতীয় নিৰ্বাচন আয়োগক দাবী জনাই ৰাজহুৱা দাবী সম্বলিত স্মাৰক পত্ৰ প্ৰেৰণ কৰাৰ লগতে অহা ২১ জুলাইত ভাৰতৰ নিৰ্বাচন আয়োগক সাক্ষাৎ কৰি দাবী সম্বলিত পত্ৰ প্ৰদান কৰিব।
