কানাডাৰ টৰন্টো বিমানবন্দৰত বৃহৎ বিমান দুৰ্ঘটনা সংঘটিত হৈছে। ডেল্টা এয়াৰলাইন্সৰ এখন বিমান অৱতৰণৰ সময়তে ওলোটা হৈ ৰাণৱেত খুন্দা মাৰে। প্ৰথম অৱস্থাত ৰাণৱেত বৰফ জমা হোৱাৰ বাবেই এই দুৰ্ঘটনা সংঘটিত হোৱা বুলি অনুমান কৰা হৈছে।
দুৰ্ঘটনা সংঘটিত হোৱাৰ সময়ত বিমানখনত ৭৬ জন যাত্ৰী আৰু ৪ জন ক্ৰু মেম্বাৰ আছিল। ইয়াৰে ১৮ জন আহত হোৱা বুলি জানিব পৰা গৈছে।
বাতৰি অনুসৰি, ডেল্টা এয়াৰলাইন্সৰ এই বিমানখন মিনিয়াপলিছৰ পৰা টৰন্টোলৈ আহিছিল। কিন্তু অৱতৰণৰ সময়তে বিমানখনে কেনেবাকৈ নিয়ন্ত্ৰণ হেৰুৱাই ৰাণৱেত বাগৰি পৰে।
দুৰ্ঘটনাৰ খবৰ পোৱাৰ লগে লগে উদ্ধাৰকাৰী দলে দ্ৰুতগতিত সেই স্থানত উপস্থিত হয়। উদ্ধাৰ কৰা হয় যাত্ৰীসকলক। এই দুৰ্ঘটনাৰ একাধিক ভিডিঅ’ পোহৰলৈ আহিছে। এটা ভিডিঅ’ত দেখা গৈছে যে বিমানখন বৰফৰ ওপৰত অৱতৰণ কৰিছে। কিছু মুহূৰ্তৰ ভিতৰতে বিমানখনৰ পৰা ক’লা ধোঁৱা ওলাই অহা দেখা গৈছে আৰু জুই লাগি গৈছে।
ঘটনাস্থলীত অগ্নিনিৰ্বাপক বাহিনীৰ লোক উপস্থিত হৈ ক্ষীপ্ৰতাৰে জুই নিয়ন্ত্ৰণ কৰে। বিমানবন্দৰ কৰ্তৃপক্ষই ঘোষণা কৰিছে যে এই দুৰ্ঘটনাৰ পিছতে বিমানবন্দৰটোৰ সকলো বিমান সেৱা বন্ধ কৰি দিয়া হৈছে।
