ধেমাজি জিলা আদালতে বৃহস্পতিবাৰে শিশুৰ বিৰুদ্ধে যৌন অপৰাধৰ তিনিটা পৃথক গোচৰত গুৰুত্বপূৰ্ণ ৰায় দিছে। POCSO আইনৰ অধীনত এই গোচৰত তিনিজনক দোষী সাব্যস্ত কৰি শাস্তি বিহা হৈছে। ন্যায়াধীশ কৌশিক হাজৰিকাৰ নেতৃত্বত আদালতে শিশুৰ সুৰক্ষাৰ প্ৰতি গুৰুত্ব প্ৰদান কৰি এই ৰায়দান দিছে।
প্ৰথমটো গোচৰত (ধেমাজি থানা, নং ১২৩/২০২৪) জিয়াঢলৰ ৰামেশ্বৰ ডলীয়ে ১০-১১ বছৰীয়া এজনী নাবালিকাক বাৰে বাৰে যৌন নিৰ্যাতন চলাইছিল। আদালতে তেওঁক ৩০ বছৰৰ কাৰাদণ্ড আৰু ৫০ হাজাৰ টকা জৰিমনাৰ শাস্তি বিহিছে। জৰিমনা নিদিলে তেওঁক অতিৰিক্ত তিনি বছৰ জে’লত থাকিব লাগিববুলি অদালতে উল্লেখ কৰিছে।
আনহাতে দ্বিতীয়টো গোচৰত ছিলাপথাৰ থানা, নং ২৩৪/২০২০, পৰিতোষ মণ্ডালে নাবালিকাক ধৰ্ষণৰ চেষ্টা কৰিছিল। তেওঁক ৫ বছৰৰ কাৰাদণ্ড আৰু ১০ হাজাৰ টকা জৰিমনা দিয়া হৈছে। টকা নিদিলে তেওঁক অতিৰিক্ত ৬ মাহ জে’লত কটাব লাগিব বুলি উল্লেখ কৰিছে ।
তৃতীয় গোচৰত (ধেমাজি, নং ৯/২০২৪) পাঞ্চালীৰ ললিত বৰাই নাবালিকাক যৌন নিৰ্যাতন চলাইছিল। আদালতে তেওঁক ৬ বছৰৰ কাৰাদণ্ড আৰু ১০ হাজাৰ টকা জৰিমনাৰ শাস্তি বিহিছে। জৰিমনা নিদিলে অতিৰিক্ত ৬ মাহ কাৰাদণ্ড ভুগিব লাগিব বুলি আদালতে নিৰ্দেশ কৰিছে। এই ৰায়ে শিশুৰ বিৰুদ্ধে অপৰাধৰ ক্ষেত্ৰত গুৰুত্বপূৰ্ণ বাৰ্তা বহন কৰিছে।
