সৰিয়হৰ ডুলিতে ওলাল ভূত!
ৰাজ্যজুৰি অসম আৰক্ষীয়ে ড্ৰাগছৰ বিৰুদ্ধে অভিযান তীব্ৰতৰ কৰি তোলাৰ সময়তে ড্ৰাগছ ব্যৱসায়ীৰে গাখীৰ-মিঠৈ সম্পৰ্ক ৰক্ষা কৰি চলাৰ অভিযোগত আৰক্ষীয়ে গ্ৰেপ্তাৰ কৰিলে ধুবুৰীৰ উপ-আৰক্ষী অধীক্ষক যতীন চন্দ্ৰ দাসক।
ধুবুৰীত সীমন্ত শাখাত নিয়োজিত এইগৰাকী আৰক্ষী বিষয়াই ড্ৰাগছ ব্যৱসায়ী চক্ৰৰ সৈতে মিলি ড্ৰাগছৰ ৰমৰমীয়া বেহা চলাই থকাৰ অভিযোগ উঠিছিল।
উক্ত অভিযোগৰ ভিত্তিতে ধুবুৰী আৰক্ষীয়ে যোৱা নিশা আৰক্ষী বিষয়াজনৰ বাসভৱনত তালাচী চলাইছিল। তালাচীৰ সময়তে আৰক্ষী বিষয়া জনৰ ঘৰৰ পৰা আৰক্ষীয়ে নগদ ৪.৭৭ লাখ টকা জব্দ কৰিবলৈ সক্ষম হয়।
আৰক্ষী বিষয়া জনৰ ঘৰৰ পৰা ৰফিকুল প্ৰামাণিক নামৰ ড্ৰাগছ ব্যৱসায়ীজনকো গ্ৰেপ্তাৰ কৰা হয়।
ধৃত আৰক্ষী বিষয়া জনৰ তথ্যৰ ভিত্তিত নিশাই ধুবুৰী আৰক্ষীয়ে বহু ঠাইত অভিযান চলায়।
ধুবুৰী আৰক্ষীয়ে অভিযুক্ত আৰক্ষী বিষয়া যতীন দাসৰ বিৰুদ্ধে ভাৰতীয় দণ্ডবিধিৰ ১২০ খ/৪০৯ ধাৰা আৰু দুৰ্নীতি বিৰোধী আইনৰ ৭ক/১২ ধাৰাত গোচৰ ৰুজু কৰিছে।
