ধুবুৰী জিলাৰ বিলাসীৰ ভেৰভেৰীত এগৰাকী টে’ট শিক্ষয়িত্ৰীয়ে আত্মহত্যা কৰা ঘটনা সন্দৰ্ভত আৰক্ষীয়ে আজি এজন লোকক আটক কৰিছে। আটকাধীন লোকজনক শ্বাহ আলম বুলি আৰক্ষীয়ে চিনাক্ত কৰিছে।
ঘটনাৰ বিৱৰণি মতে আটকাধীন তথা অভিযুক্ত শ্বাহ আলমৰ সৈতে শিক্ষয়ত্ৰী গৰাকীৰ ৩০ মে’ত কোনো কথাত কাজিয়া লাগিছিল। ইয়াৰ পিছতে অভিযুক্ত শ্বাহ আলমে শিক্ষয়িত্ৰীগৰাকীৰ কিছু আপত্তিজনক ফটো ছ’চিয়েল মিডিয়াৰ জৰিয়তে ভাইৰেল কৰিছিল।
ফলত শিক্ষয়িত্ৰী গৰাকীয়ে উক্ত দিনাই এই কথাত মানসিক ভাৰসাম্য হেৰুৱাই নিজৰ ভাৰাতীয়া ঘৰতে আত্মহত্যা কৰিছিল।
ইতিমধ্যে বিলাসীপাৰা আৰক্ষী চকীত অভিযুক্ত শ্বাহ আলমৰ বিৰুদ্ধে ভাৰতীয় দণ্ডবিধি আইনৰ ৩০৬ ধাৰাত ৮৬/২০১৯ নম্বৰত এক গোচৰ ৰুজু কৰি আৰক্ষীয়ে তদন্ত অব্যাহত ৰাখিছে।
‘ঘটনাস্থলীত চলোৱা প্ৰাথমিক তদন্ত আৰু ঘটনাস্থলীৰ পৰা সংগৃহীত তথ্যৰ ওপৰত ভিত্তি কৰি আমি অভিযুক্তৰ বিৰুদ্ধে এজাহাৰ দাখিল কৰি ৩০৬ ধাৰাত গোচৰ ৰুজু কৰিছো। লগতে এই ঘটনাৰ সৈতে অন্য কোনো ব্যক্তি জড়িত আছে নিকি তাৰ ওপৰতো আমি অনুসন্ধান চলাইছো।’ ধুবুৰী জিলাৰ আৰক্ষী অধীক্ষক নিৰুপম হাজৰিকাই নৰ্থ ইষ্ট নাওৰ আগত এনেদৰে মন্তব্য কৰে।
আত্মহত্যা কৰা শিক্ষয়িত্ৰী গৰাকীৰ মৃতদেহ বৰ্তমান ধুবুৰী অসামৰিক চিকিৎসালয়ৰ মৰ্গত ৰখা হৈছে।
উল্লেখযোগ্য যে পূৰ্বতেও যোৰহাট জিলাৰ মৰিয়নীত এজন টে’ট শিক্ষকক তেওঁৰ পত্নীৰ আশ্লীল ভিডিঅ’ বনাই ব্লেকমেইলিং কৰাৰ বাবে ৰে’লৰ আগত জপিয়াই আত্মহত্যা কৰিছিল।
