ধুবুৰী আৰক্ষীয়ে শনিবাৰে সন্ধিয়া এজন ড্ৰাগছ সৰবৰাহকাৰীক গ্ৰেপ্তাৰ কৰাৰ লগতে ১লাখ টকা মূল্যৰ নিষিদ্ধ মেথামফেটামাইন বৰি (WY tablets) জব্দ কৰে।
আৰক্ষীয়ে লগতে নিষিদ্ধ ড্ৰাগছখিনি কঢ়িয়াই অনা এখন কাড়ীও জব্দ কৰে।
সূত্ৰসমূহৰ মতে, বিশেষ তথ্যৰ ভিত্তিত ধুবুৰীৰ উপ আৰক্ষী অধীক্ষক ত্ৰিনয়ন ভূঞাৰ নেতৃত্বত ধুবুৰী আৰক্ষীয়ে এক অভিযান চলাইছিল।
অভিযানৰ সময়ত আৰক্ষীয়ে শনিবাৰে সন্ধিয়া ধুবুৰী চহৰত প্ৰৱেশ কৰাৰ পাছতে এখন গাড়ী ধৰা পেলায়।
‘’বিশেষ তথ্যৰ ভিত্তিত সেই নিষিদ্ধ ড্ৰাগছখিনি কঢ়িয়াই অনা এএছ-১৬বি-৩২৭৩ পঞ্জীয়ন নম্বৰৰ এখন হুণ্ডাই ৱাৰ্ণা কাৰ সন্ধিয়া ধুবুৰী চহৰত প্ৰৱেশ কৰাৰ পাছতে ধুবুৰীৰ উপ আৰক্ষী অধীক্ষক ত্ৰিনয়ন ভূঞাৰ নেতৃত্বত আৰক্ষীয়ে ধৰা পেলায়,’’-সূত্ৰসমূহে কয়।
গাড়ীখনত তালাচী চলাই আৰক্ষীয়ে ১লাখ টকা মূল্যৰ ১,৪০০টা নিষিদ্ধ মেথামফেটামাইন বৰি (WY tablets) উদ্ধাৰ কৰাৰ লগতে গাড়ীখনৰ ভিতৰৰ পৰা ড্ৰাগছখিনি লৈ অহা এজন এজন সৰবৰাহকাৰীক আটক কৰে।
ড্ৰাগছ সৰবৰাহকাৰীজনক বিটিএডিৰ কোকৰাঝাৰ জিলাৰ ফৰিৰাগ্ৰাম আৰ৭ঈ থানাৰ অন্তৰ্গত কাৰাইটাৰী গাঁৱৰ বাসিন্দা ছাইদুল ৰহমানৰ পুত্ৰ ছাইদুল ইছলাম(৩৬) বুলি চিনাক্ত কৰা হৈছে।
পাছত, উদ্ধাৰ কৰা ড্ৰাগছখিনৰ সৈতে গাড়ীখন জব্দ কৰি যাৱতীয় ব্যৱস্থা গ্ৰহণ কৰা হয় আৰু অপৰাধীজনক আৰক্ষীৰ জিম্মাত লোৱা হয়।
গোটেই অভিযানটো নিৰীক্ষণ কৰা ধুবুৰীৰ উপ আৰক্ষী অধীক্ষক ত্ৰিনয়ন ভূঞাই জানিবলৈ দিয়ে যে ঘটনাটোৰ বিতং তদন্ত চলাই থকা হৈছে।
