অসম গণ পৰিষদ দলে আগন্তুক উত্তৰ কাছাৰ পাৰ্বত্য স্বায়ত্ত শাসিত পৰিষদ নিৰ্বাচনৰ বাবে ককালত টঙালি বান্ধি নামি পৰিছে। ইয়াৰ বাবে পাৰ্বত্য জিলাৰ ২৮খন পৰিষদীয় আসনৰ ভিতৰত অগপ ডিমা হাচাও কমিটিয়ে কেন্দ্ৰীয় নেতৃত্বৰ অনুমোদন সাপেক্ষে আজি ১৮খন আসনৰ প্ৰাৰ্থী তালিকা এক সংবাদ মেলৰ যোগেদি আনুষ্ঠানিক ভাৱে প্ৰকাশ কৰে। সংবাদ মেলত উপস্থিত আছিল প্ৰাক্তন চিইএম দেবজিত থাউচন, প্ৰাক্তন সাংসদ প্ৰকান্ত ৱাৰিচা, জিলা সভাপতি বকুল বড়ো আদি নেতা কৰ্মী।
১৮ খন আসনৰ প্ৰাৰ্থী সকল হ’ল জাটিঙ্গা— মৰিল মাছা, বৰাইল— গুলমিনলাল লিয়েনথাং, লাইছং— গালাকবে নিউমে, দিয়ুংমুখ— সূৰ্যলাল কেম্প্ৰাই, গৰমপানি—হাৰভেষ্ট কাথাৰ, হাৰাঙ্গাজাও— মুক্তাঙচু হোজাই, ল’ৱাৰ খাৰতং— লালৰূপই মাৰ, দলং— খুমথ’লিয়ান ৰাঙখল, গুনজুং— বিজয়েন্দ্ৰ চেঙগুইন, হাডিঙ্গমা— অজিত হোজাই, দেহাঙ্গী— বাবলু জহৰী, দিহামলাই— জচিয়াছ জেমি, লাঙটিং— দেবজিত থাউচেন, ৱাজো— ৰাওলেছ কেম্প্ৰাই, হাতিখালী— প্ৰশন্ন হাছনু, দাওটোহাজা— বাইটেন্দ্ৰ স্ৰংফং, চেমখৰ— প্ৰশান্ত ফংলো আৰু মাইবাঙ পশ্চিম— সুব্ৰত হোজাই।
অগপ নেতা দেবজিত থাউচেন আৰু প্ৰকান্ত ৱাৰিচা আশাবাদী যে আগন্তুক পৰিষদীয় নিৰ্বাচনত অগপ দলে জিলাখনৰ ভালে সংখ্যক আসনত জয় লাভ কৰিব। সাংবাদিকৰ প্ৰশ্নৰ উত্তৰত দেবজিত থাউচেনে কয় যে আন আন দলে এতিয়ালৈকে প্ৰাৰ্থীৰ তালিকা ৰাজহুৱা কৰা নাই। সেই কাৰণে অগপৰ লগত কাৰ প্ৰতিদ্বন্দ্বিতা হয় এই মুহুৰ্তত কোৱা টান হ’ব। প্ৰকান্ত ৱাৰিচাই কয় যে তেওঁ নিজে হাফলঙৰ পৰা প্ৰতিদ্বন্দ্বিতা কৰাৰ বাবে সাজু হৈছে। কিন্তু এতি ৰাজ্যিক নেতৃত্বৰ সিদ্ধান্তৰ ওপৰত সেয়া নিৰ্ভৰ কৰিব। অবশ্যে হাফলঙৰ পৰা প্ৰাৰ্থিত্ব লাভ কৰিলে তেওঁ অনায়াসে জয় লাভ কৰিব বুলি দৃঢ়তাৰে কয়।
