ডিমা হাচাও আৰক্ষীয়ে হাৰাংগাজাওৰ পৰা য়ুনাইটেড ট্ৰাইবাল লেবাৰেছন ফ্ৰণ্ট চমুকৈ (য়ুটিএলএ)ৰ তিনিগৰাকী কেডাৰক আটক কৰে। আটকাধীন উগ্ৰপন্থী সদস্যসকলৰ পৰা আৰক্ষীয়ে .৩২ পিস্তল, এটা মেগাজিন আৰু তিনি জাঁই গুলী উদ্ধাৰ কৰিছে।
১২ মাৰ্চৰ নিশা এক গোপন সূত্ৰৰ পম খেদি ডিমা হাচাও আৰক্ষীয়ে হাৰাংগাজাওৰ পূৰণি ৰে’ল ষ্টেশ্যনৰ পৰা মণিপুৰৰ উগ্ৰপন্থীৰ তিনিগৰাকী কেডাৰক আটক কৰে। ইয়াৰে দুগৰাকী কেডাৰক আৰক্ষীয়ে চিনাক্ত কৰাৰ বিপৰীতে আনগৰাকীৰ পৰিচয় বাতৰি লিখা পৰলৈকে জানিব পৰা হোৱা নাই।
ডিমা হাচাও জিলাৰ আৰক্ষী অধীক্ষকে জনোৱা অনুসৰি মণিপুৰত য়ুটিএলএৰ দুটা গোট আছে। ক্ৰমে য়ুটিএলএ আৰু য়ুটিএলএ (এছকে থাদ’ গোট)। এই গোটৰ এগৰাকী সতীৰ্থ গোট বদল কৰি এতিয়া বেলেগ গোটত আছে । যিয়ে এছকে গোটৰ লগত প্ৰতিহিংসাত লিপ্ত হৈ পলাই ফুৰিছে আৰু হাৰাংগাজাওত আশ্ৰয় লোৱা বুলি আৰক্ষীৰ হাতত তথ্য আছে।
গোট বদলি কৰি থকা কেডাৰজনক মৰাৰ কাৰণে আটকাধীন তিনিগৰাকী কেডাৰে হাৰাংগাজাওলৈ অহা বুলি আৰক্ষীৰ সোধপোছত কেডাৰকেইজনে স্বীকাৰ কৰা বুলি আৰক্ষী অধীক্ষক শ্ৰীজিত টিয়ে নৰ্থ ইষ্ট নাওক জানিবলৈ দিয়ে। বৰ্তমান তিনিওকেইগৰাকী কেডাৰ হাফলং আৰক্ষীৰ জিম্মাত আছে বুলি আৰক্ষী সূত্ৰে জানিব পৰা গৈছে।
