সমকামী ডেটিং এপত চা-চিনাকি। তাৰ পাছত হোটেলৰ কোঠাত সাক্ষাৎ। তাতেই ঘটিল অঘটন। ৫৭ বছৰীয়া চিকিৎসকৰ নগ্ন ফটো তোলাৰ পৰাই আৰম্ভ হৈছিল এই ব্লেকমেইল। অৱশেষত মৃত্যুৰ ভাবুকি পোৱাৰ পাছত বাৰাণসীৰ এখন হোটেলত ৰাতিটো জমা কৰা ধনখিনি দি নিজকে উদ্ধাৰ কৰে।
যোৱা দেওবাৰে বাৰাণসীৰ এখন হোটেলত সংঘটিত হৈছিল এই ঘটনা। অভিযোগ অনুসৰি, চিকিৎসকজনে গে ডেটিং এপত এজন পুৰুষ সংগীৰ সৈতে কথা-বতৰা পাতিছিল। কথা পাতি থাকোঁতে তেওঁ নিজৰ ফোন নম্বৰ আৰু হোটেলৰ ঠিকনা শ্বেয়াৰ কৰে। বিয়েৰৰ বটল কেইটামান লৈ মানুহজনক হোটেললৈ আহিবলৈ অনুৰোধ কৰিলে।
বিকাশ নামৰ লোকজন নিশা ১০ মান বজাত হোটেলত উপস্থিত হয়। বিয়েৰ আৰু কিছু জলপান আছিল। কিছু সময় একেলগে কটোৱাৰ পিছত হঠাতে তাৰ আচৰণ সলনি হ’ল। ডাক্তৰক ক’লে, “এই বয়সত এইবোৰ কাম তোমাৰ লগত খাপ নাখায়। তুমি শিৱনগৰীলৈ আহিছা, এইবোৰ কৰাটো ঠিক নহয়।”
ইয়াৰ পিছত অলপ সময়ৰ ভিতৰতে তেওঁ চিকিৎসকগৰাকীৰ নগ্ন ফটো তুলি বহুবাৰ চৰ মাৰিছিল বুলি অভিযোগ উঠিছে। ইয়াতেই শেষ নহয়। বিকাশে গিলাচ এটা ভাঙি ডাক্তৰৰ ফালে আঙুলিয়াই ক’লে, “আঠ লাখ টকা নিদিলে ছবি বিয়পাই দিব। তেওঁ কয় যে তেওঁৰ ৰাজনৈতিক সংযোগ আছে আৰু আনকি তেওঁক হত্যা কৰিব পৰা লোককো চিনি পায়।”
ডাক্তৰজন আতংকিত হৈ পৰিল। অভিযোগ অনুসৰি, গোটেই ৰাতি আৰু পিছদিনা পুৱালৈকে তেওঁ ইউ পি আই আৰু এ টি এমৰ জৰিয়তে মুঠ ৮ লাখ টকা উলিয়াইছিল। পাছত বিকাশে হোটেলৰ পৰা পলায়ন কৰে। বাৰাণসীৰ সহকাৰী আৰক্ষী আয়ুক্ত ঈশান্ত ছোনীয়ে কয় যে অভিযুক্তৰ বিৰুদ্ধে ভাৰতীয় দণ্ডবিধিৰ ৩০৮ ধাৰাত গোচৰ ৰুজু কৰা হৈছে।ইতিমধ্যে তদন্ত আৰম্ভ হৈছে।
