ডমিনিকান ৰিপাব্লিকৰ ৰাজধানী ছান্টো ডমিংগোৰ এটা নাইট ক্লাৱত সংঘটিত হৈছে ভয়ানক ঘটনা। নাইট ক্লাৱটোৰ চাল ভাঙি পৰা বাবে কমেও ৭৯ জনৰ মৃত্যু হয়। লগতে ১৫০ জনতকৈ অধিক লোক আহত হোৱা বুলি জানিব পৰা গৈছে।
মৃত্যু হোৱা লোক সকলৰ ভিতৰত আছিল এজন প্ৰাদেশিক গৱৰ্ণৰ আৰু মেজৰ লীগ বেছবলৰ প্ৰাক্তন পিটচাৰ অক্টাভিঅ’ ডটেল।
ধ্বংসাৱশেষৰ পৰা উদ্ধাৰ কৰি চিকিৎসালয়লৈ যোৱাৰ পথত ৫১ বছৰীয়া ড’টেলৰ মৃত্যু হয়।
মঙলবাৰে পুৱাৰ ভাগত জেট চেট নাইট ক্লাৱত জনপ্ৰিয় মেৰেংগু গায়ক ৰুবি পেৰেজৰ সংগীতানুষ্ঠানত সংঘটিত হয় এই ঘটনা।
উল্লেখ্য যে ঘটনা সংঘটিত হোৱাৰ সময়ত নাইট ক্লাৱটোত কেইবাশ লোক উপস্থিত আছিল। বৰ্তমানৰ প্ৰায় ৪০০ উদ্ধাৰকাৰীয়ে এতিয়াও জীৱিত লোকৰ সন্ধানত অভিযান অব্যাহত ৰাখিছে। মৃতকৰ সংখ্যা আৰু বৃদ্ধি হোৱাৰ আশংকা প্ৰকাশ কৰিছে প্ৰশাসনে।
জৰুৰীকালীন অভিযান কেন্দ্ৰৰ সঞ্চালক জুয়ান মেনুৱেল মেণ্ডেজে কয় যে ভাঙি পৰা চালৰ তলত বহু লোক এতিয়াও জীয়াই থাকিব পাৰে।
জেট চেট হৈছে ছান্টো ডমিংগোৰ এটা জনপ্ৰিয় নাইটক্লাৱ। ইয়াত নিয়মিতভাৱে প্ৰতি সোমবাৰে সন্ধিয়া নৃত্য আৰু সংগীতৰ অনুষ্ঠান অনুষ্ঠিত কৰা হয়। এই অনুষ্ঠানত ৰাজনীতিবিদ, খেলুৱৈ আৰু অন্যান্য বিশিষ্ট ব্যক্তিসকল উপস্থিত থাকে।
উল্লেখ্য যে ভুক্তভোগীসকলৰ ভিতৰত মণ্টে ক্ৰীষ্টি প্ৰদেশৰ গৱৰ্ণৰ নেলচি ক্ৰুজেও আছে বুলি ৰাষ্ট্ৰপতি লুইছ এবিনাডাৰে জানিবলৈ দিছে। ইয়াৰ উপৰিও সাতবাৰৰ মেজৰ লীগ বেছবল অল ষ্টাৰ প্ৰাক্তন বেছবল খেলুৱৈ নেলছন ক্ৰুজৰ ভগ্নীও ঘটনাস্থলীত আছিল।
এই অনুষ্ঠানত সংগীত পৰিৱেশন কৰা গায়ক ৰুবি পেৰেজৰ কন্যাই কয় যে ধ্বংসাৱশেষত আবদ্ধ হৈ থকাসকলৰ ভিতৰত তেওঁৰ পিতৃও আছে।
