আমেৰিকাৰ প্ৰাক্তন ৰাষ্ট্ৰপতি ডোনাল্ড ট্ৰাম্পে ৰাষ্ট্ৰপতি জো বিডেন প্ৰশাসনৰ ইউক্ৰেইনলৈ টেংক প্ৰেৰণৰ সিদ্ধান্তক তীব্ৰ সমালোচনা কৰিছে।
ট্ৰাম্পে ইউক্ৰেইনক শেহতীয়া অত্যাধুনিক টেংক দিয়াৰ সিদ্ধান্তৰ তীব্ৰ সমালোচনা কৰিছে। তেওঁ ইউক্ৰেইনৰ ওপৰত ৰাছিয়াৰ আক্ৰমণ বন্ধ কৰাৰ প্ৰচেষ্টাক “উন্মত্ত যুদ্ধ” বুলিও অভিহিত কৰিছে।
ইউক্ৰেইনলৈ সহায়ৰ হাত আগবঢ়োৱা সম্পৰ্কত শেহতীয়া সমালোচনাত আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতিগৰাকীয়ে কয় যে আব্ৰামছ এম ১ টেংক প্ৰেৰণ কৰাটো এনে এক প্ৰৰোচনা যি পাৰমাণৱিক যুদ্ধৰ সৃষ্টি কৰিব পাৰে।
ট্ৰাম্পে তেওঁৰ ছ’চিয়েল মিডিয়া ছাইটত লিখিছে, “টেংকেৰে আৰম্ভ, ইয়াৰ পিছত পাৰমাণৱিক বোমা।‘’ তেওঁ লগতে লিখিছে “এতিয়াই এই উন্মত্ত যুদ্ধৰ সমাপ্তি হ’বলৈ দিয়ক। এইটো কৰা অতি সহজ।‘’
ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে পশ্চিমীয়া মিত্ৰশক্তিক চলিত যুদ্ধত ৰাছিয়াক প্ৰতিহত কৰিবলৈ টেংক বিচাৰি বাৰে বাৰে আহ্বান জনাইছিল। অৱশ্যে ইয়াকলৈ আমেৰিকা যুক্তৰাষ্ট্ৰ আৰু জাৰ্মানীৰ মাজত মতভেদৰ সৃষ্টি হয়।
বাতৰি অনুসৰি, জাৰ্মানী আৰু আমেৰিকা যুক্তৰাষ্ট্ৰই অৱশেষত মতভেদ সমাধানৰ বাবে কেইবা সপ্তাহধৰি চলোৱা প্ৰচেষ্টাৰ অন্তত ইউক্ৰেইনৰ অনুৰোধৰ প্ৰতি আনুষ্ঠানিকভাৱে সঁহাৰি জনাইছে। জাৰ্মানীয়ে ইউক্ৰেইনক ১৪ খন লেপাৰ্ড টেংক দিয়াৰ কথা ঘোষণা কৰিছে। আনহাতে, আমেৰিকা যুক্তৰাষ্ট্ৰই কৈছে যে ই ইউক্ৰেইনক ৩১ খন আব্ৰামছ টেংক দিব।
ইপিনে, সংবাদ সংস্থাৰ এক প্ৰতিবেদন অনুসৰি, ইউক্ৰেইনক টেংক দিয়াৰ আমেৰিকা যুক্তৰাষ্ট্ৰৰ সিদ্ধান্তক তীব্ৰ সমালোচনা কৰিছে ৰাছিয়াই। ৱাশ্বিংটনত ৰাছিয়াৰ ৰাষ্ট্ৰদূত আনাতোলি এণ্টনভে মঙলবাৰে এক বিবৃতিত কয় যে ইয়াক ৰাছিয়াৰ বিৰুদ্ধে আন এক “স্পষ্ট উচটনি” হিচাপে লোৱা হ‘ব।
ৰাছিয়াৰ প্ৰাক্তন ৰাষ্ট্ৰপতি দিমিত্রি মেদভেদেভে ইয়াৰ পূৰ্বে সতৰ্ক কৰি দিছিল যে ৰাছিয়াই ইউক্ৰেইনত ইয়াৰ নিয়ন্ত্ৰিত অঞ্চল সুৰক্ষিত কৰিবলৈ পাৰমাণৱিক অস্ত্ৰ ব্যৱহাৰ কৰিবলৈ কুণ্ঠাবোধ নকৰিব। ২২ ছেপ্টেম্বৰত তেওঁ এটা টেলিগ্ৰাম এপত লিখিছিল যে “কৌশলগত পাৰমাণৱিক অস্ত্ৰ” সহ ৰাছিয়াৰ সকলো ধৰণৰ অস্ত্ৰ এনে সুৰক্ষাৰ বাবে কামত লগোৱা হ’ব।
