উত্তৰ-পূব ইউক্ৰেইনত এখন যাত্ৰীবাহী বাছত ৰাছিয়াৰ ড্ৰ’নে আক্ৰমণ কৰাৰ ফলত ৯ জন লোক নিহত হৈছে। ইতিমধ্যে ইউক্ৰেইনৰ স্থানীয় কৰ্তৃপক্ষই এই কথা সদৰী কৰিছে।
ছুমি আঞ্চলিক সামৰিক প্ৰশাসনে শনিবাৰে পুৱা বিলোপিলিয়া চহৰত সংঘটিত আক্ৰমণত আন চাৰিজন লোক আহত হোৱা বুলি জনাইছে।
২০২২ চনৰ পিছত প্ৰথমবাৰৰ বাবে ৰাছিয়া আৰু ইউক্ৰেইনে শান্তিৰ বাবে প্ৰত্যক্ষ আলোচনা কৰাৰ মাত্ৰ কেইঘণ্টামানৰ পিছতে এই আক্ৰমণ সংঘটিত হয়।
ছুমি আঞ্চলিক সামৰিক প্ৰশাসনে টেলিগ্ৰামত এক পোষ্টযোগে কয় যে বিলোপিলিয়াৰ সমীপত শত্ৰুৰ ড্ৰ’নে এখন যাত্ৰীবাহী বাছত আক্ৰমণ কৰাৰ ফলত ৯ জন লোক নিহত আৰু ৪ জন আহত হয়।
অৱশ্যে এই আক্ৰমণ সন্দৰ্ভত ৰাছিয়াৰ সেনাই এতিয়াও কোনো মন্তব্য কৰা নাই।
উল্লেখ্য যে শুকুৰবাৰে তুৰস্কৰ ইস্তানবুলত ৰাছিয়া আৰু ইউক্ৰেইনৰ মাজত হোৱা আলোচনাত এই যুদ্ধ কেনেকৈ শেষ কৰিব পাৰি সেই সন্দৰ্ভত কোনো সিদ্ধান্তত উপনীত হ’ব নোৱাৰিলে।
অৱশ্যে আগন্তুক দিনত দুয়োপক্ষই এক হাজাৰ যুদ্ধবন্দীক পৰস্পৰে পৰস্পৰক ঘূৰাই দিব বুলি সহমতত উপনীত হয়।
