সমগ্ৰ দেশৰ লগতে অসমতো সম্প্ৰতি ভয়াৱহ পৰিস্থিতিৰ সৃষ্টি কৰিছে কৰোনা মহামাৰীয়ে। ৰাজ্যৰ চৌদিশে এতিয়া যেন কেৱল মাত্ৰ মৃত্যুৰ বিভিষিকা।
ইয়াৰ অন্তৰালত এটা কথা স্পষ্ট যে কৰবাত আমাৰ মাজতেই যে সজাগতাৰ অভাৱ ঘটিছে তাক কিন্তু কোনো কাৰণতে নুই কৰিব নোৱাৰি!
এনে সময়তে নগাঁও জিলাৰ কাষৰিগাঁৱৰ এজন সত্তৰ উৰ্ধ্বৰ চিত্ৰ শিল্পীয়ে দেখুৱাইছে এক উল্লেখনীয় নিদৰ্শন।
চাৰিওফালে কোভিড সংক্ৰমিত লোকৰ সংখ্যা অভাবনীয়ভাৱে বৃদ্ধি হৈ অহাৰ খবৰ পাই মহেন্দ্ৰ বৰা নামৰ বৃদ্ধ শিল্পীজনে হাতত ৰং-তুলিকা লৈ ৰাজহুৱা স্থানত অংকন কৰিছে কোভিড-১৯ৰ সন্দৰ্ভত সজাগতামূলক বহুবোৰ বাণী।
সম্পূৰ্ণ খৰচ নিজাববীয়াকৈ বহন কৰি শিল্পী গৰাকীয়ে প্ৰথম অৱস্থাত কাষৰিগাঁও মজলীয়া বিদ্যালয় প্ৰাংগনৰ দেৱাল অংকন কৰাৰ লগতে ৰাইজক সজাগ কৰাৰ স্বাৰ্থত শিল্পীগৰাকীয়ে পুৰণিগুদামৰ বহুকেইটা ৰাজহুৱা স্থানতো এই বাণীসমূহ অংকন কৰাৰ বাবে আৰম্ভ কৰিছে এক নিজাববীয়া অভিযান।
তেওঁ ইয়াৰ যোগেদি আহ্বান জনাইছে যে এই জটিল সন্ধিক্ষণত ৰাইজে চৰকাৰ তথা স্বাস্থ্য বিভাগে জাৰি কৰা কোভিড সংক্ৰান্তীয় সকলো নীতি-নিৰ্দেশনা আখৰে-আখৰে পালন কৰি মাস্ক পৰিধান কৰাৰ লগতে সামাজিক দূৰত্ব প্ৰতি মুহূৰ্ততে বজাই ৰাখে।
বয়সীয়াল শিল্পীগৰাকীয়ে আগবঢ়োৱা এনে ইতিবাচক পদক্ষেপৰ প্ৰতি এতিয়া বৃহত্তৰ পুৰণিগুদাম অঞ্চলৰ সকলোৰে দৃষ্টি আকৰ্ষিত কৰিবলৈ সক্ষম হোৱা পৰিলক্ষিত হৈছে।
