সংসদৰ বৰ্ষাকালীন অধিৱেশনৰ আজি অষ্টম দিনৰ কাৰ্যসূচী আৰম্ভ হৈছে। ৰাজ্যসভাত দেওবাৰে বিৰোধী সাংসদৰ আক্ৰমণৰ ঘটনাৰ বিষয়টো আজি উত্থাপন কৰা হয়।
ৰাজ্যসভাৰ অধ্যক্ষই সদনত হুলস্থুলৰ সৃষ্টি কৰা সাংসদৰ বিৰুদ্ধে কাৰ্যব্যৱস্থা গ্ৰহণ কৰে। আক্ৰমণৰ ঘটনাৰ সৈতে জড়িত বিৰোধী দলৰ ৮গৰাকী সাংসদক এসপ্তাহৰ বাবে নিলম্বন কৰা হৈছে।
নিলম্বিত হোৱা সাংসদসকলৰ ভিতৰত আছে ডেৰেক অ’ ব্ৰাইন, সঞ্জয় সিং, ৰিপুন বৰা, নজীৰ হুছেইন, কে কে ৰাগেশ, এ কৰিম, ৰাজীৱ ছাটব আৰু ডোলা সেন।
দেওবাৰৰ ঘটনা সন্দৰ্ভত অধ্যক্ষই কয় যে এয়া ৰাজ্যসভাৰ বাবে আটাইতকৈ দুৰ্ভাগ্যজনক দিন আছিল। ৰুল বুক দলিয়াই দিয়া হৈছে। এই ঘটনাত মই অতি দুখ পাইছো।
তেওঁ কয় যে উপাধ্যক্ষক ভাবুকি দিয়া হৈছে। তেওঁৰ ওপৰত আপত্তিজনক মন্তব্য কৰা হৈছে।
উল্লেখ্য যে দেওবাৰে দুখন কৃষি বিধেয়কক লৈ ৰাজ্যসভা উত্তপ্ত হৈ পৰিছিল। উপাধ্যক্ষ হৰিবংশ নাৰায়ন সিঙৰ সিদ্ধান্তৰ বিৰুদ্ধে প্ৰতিবাদৰ সময়ত অধ্যক্ষৰ ডেস্কৰ মাইক্ৰ’ফোন কেইগৰাকীমান সাংসদে ভাঙি পেলায়।
উপাধ্যক্ষৰ কাষত থিয় হৈ প্ৰতিবাদ কৰাৰ লগতে কাগজ ফালি পেলোৱাৰ দৃশ্যও কেমেৰাত ধৰা পৰিছিল।
সেই আক্ৰমণৰ সময়ত উপাধ্যক্ষক ৰুল বুক দেখুওৱাৰ চেষ্টা কৰিছিল তৃণমূল কংগ্ৰেছৰ সাংসদ ডেৰেক অ’ ব্ৰাইনে।
ইয়াৰ পাছত আপৰ সাংসদ সঞ্জয় সিঙক মাৰ্শ্বালে বাহিৰলৈ উলিয়াই নিয়ে।
দেওবাৰে অধিৱেশন শেষত কমেও ১২ গৰাকী বিৰোধী সাংসদে ৰাজ্যসভাৰ কক্ষত বিক্ষোভ প্ৰদৰ্শন কৰাৰ লগতে ৰাজ্যসভাৰ উপাধ্যক্ষ হৰিবংশ নাৰায়ন সিঙৰ বিৰুদ্ধে তেওঁলোকে অনাস্থা প্ৰস্তাৱো আনে।
