অসমবাসীৰ অতি আপোন, হিয়াৰ আমঠু শিল্পী জুবিন গাৰ্গৰ আকস্মিক মৃত্যুৱে ৰাজ্যখনক শোকস্তব্ধ কৰি তুলিছে। কিংবদন্তি শিল্পীগৰাকীৰ প্ৰতি শ্ৰদ্ধা জনাই হাজাৰ হাজাৰ লোক ৰাজপথলৈ আহিছে।
অসমৰ বিভিন্ন প্ৰান্তৰ গাঁৱে-ভূঞে, চহৰে-নগৰে জনসাধাৰণে শিল্পীগৰাকীলৈ শ্ৰদ্ধাঞ্জলি জনাই মমবাতি আৰু চাকি জ্বলাই, প্ৰাৰ্থনা কৰি, সমাৱেশ অনুষ্ঠিত কৰিছে। ৰাজধানী চহৰ গুৱাহাটীতো অনুৰাগীসকলে তেওঁলোকৰ প্ৰিয় “জুবিন দা”ৰ প্ৰতি শোক আৰু শ্ৰদ্ধা জনাবলৈ ৰাজপথত ভিৰ কৰিছে।
গুৱাহাটীৰ ইলেক্ট্ৰিক অটো এছ’চিয়েশ্যনে জুবিন গাৰ্গলৈ উৎসৰ্গিত এক বিশেষ সমাৱেশৰ আয়োজন কৰে। গণেশগুৰিৰ পৰা আৰম্ভ হোৱা এই শোভাযাত্ৰাত শতাধিক বৈদ্যুতিক অটো চালকে অংশগ্ৰহণ কৰে। ব্যস্ত জি.এছ.ৰোডৰ মাজেৰে আগবাঢ়ি যোৱা এই শোভাযাত্ৰা জুবিনৰ জনসাধাৰণৰ সৈতে যুগমীয়া সংযোগৰ প্ৰতীকী উদযাপনলৈ ৰূপান্তৰিত হয়।
অটোচালক আৰু অনুৰাগীসকলে প্ৰয়াত কিংবদন্তিগৰাকীৰ প্ৰতি সন্মান জনাই শ্লোগান দি বেনাৰ আৰু ফটো কঢ়িয়াই লৈ যায়। এই দৃশ্য জুবিনৰ প্ৰতি থকা ৰাইজৰ মৰম আৰু ভালপোৱাৰ অনন্য নিৰ্দশন।
বহু অংশগ্ৰহণকাৰীয়ে শ্বেয়াৰ কৰিছে যে এই শোভাযাত্ৰা কেৱল শোক প্ৰকাশৰ প্ৰতীকেই নহয় বৰঞ্চ জুবিন গাৰ্গৰ কলাৰ জৰিয়তে অসমবাসীক গৌৰৱ আৰু পৰিচয় প্ৰদান কৰা সাংস্কৃতিক ধ্বজাবাহক হিচাপে লোৱা ভূমিকাৰ প্ৰতিও শ্ৰদ্ধাঞ্জলি।
