বিক্ৰী হৈ গ’ল এক্স (Elon Musk’s xAI acquires X) । ইলন মাস্কে নিজেই দিছে এই তথ্য। শুকুৰবাৰে মাস্কে ঘোষণা কৰে যে তেওঁৰ কৃত্ৰিম বুদ্ধিমত্তা কোম্পানী xAI য়ে ৪৫ বিলিয়ন ডলাৰৰ অল ষ্টক লেনদেনৰ জৰিয়তে X (পূৰ্বৰ টুইটাৰ)ক কিনি লৈছে।
ইয়াৰ ভিতৰত এক্সৰ ১২ বিলিয়ন ডলাৰৰ ঋণৰ বোজাও এক্সএআইৰ ওপৰত পৰিব। এই প্ৰসংগত এক্সৰ বজাৰ মূল্য ৩৩ বিলিয়ন ডলাৰ নিৰ্ধাৰণ কৰা হৈছে। আৰু এক্সএআইৰ বজাৰ মূল্য ৮০ বিলিয়ন ডলাৰ।
এই পদক্ষেপৰ জৰিয়তে মাস্কে কৃত্ৰিম বুদ্ধিমত্তা আৰু ছ’চিয়েল মিডিয়াক একত্ৰিত কৰাৰ দিশত এক পদক্ষেপ গ্ৰহণ কৰিছে। ছ’চিয়েল মিডিয়াৰ বাৰ্তাত ইলন মাস্কে লিখিছে, ‘এক্সএআই আৰু এক্সৰ ভৱিষ্যত আন্তঃসংলগ্ন। আজি আমি আনুষ্ঠানিকভাৱে ডাটা, মডেল, গণনা, বিতৰণ আৰু প্ৰতিভাক একত্ৰিত কৰাৰ পদক্ষেপ গ্ৰহণ কৰিছো।’
মাস্কে লগতে কয়, “মই এক্সএআই আৰু এক্সৰ সকলোৰে কঠোৰ পৰিশ্ৰমক স্বীকৃতি দিব বিচাৰো যিয়ে আমাক এই পৰ্যায়লৈ লৈ আনিছে। এইটো মাত্ৰ আৰম্ভণিহে।” ‘সত্যান্বেষী’ কৃত্ৰিম বুদ্ধিমত্তাৰ তালিকাত এক্সএআইক আগস্থানত ৰাখিবলৈ চেষ্টা কৰিছে মাস্কে। এক্সএআইৰ অত্যাধুনিক প্ৰযুক্তি আৰু ৬০ কোটিতকৈ অধিক ব্যৱহাৰকাৰীৰ সৈতে এআই সম্পৰ্কীয় কাম আৰু আগবাঢ়িব বুলি আশা কৰা হৈছে।
ইয়াৰ পূৰ্বে ইলন মাস্কে ২০২২ চনত টুইটাৰ ক্ৰয়ৰ চুক্তি সম্পূৰ্ণ কৰিছিল। অৱশ্যে তাৰ আগতে ইলন মাস্কে পূৰ্বে টুইটাৰৰ সৈতে চুক্তি বাতিল কৰাৰ চেষ্টা কৰিছিল। আনকি বিষয়টো আদালতৰ ওচৰ পাইছিল।
মাস্কে অভিযোগ কৰিছিল যে ৪৪ মিলিয়ন ডলাৰৰ চুক্তিৰ সময়ত টুইটাৰে তেওঁক কোম্পানীটোৰ বিষয়ে বিভ্ৰান্তিকৰ তথ্য প্ৰদান কৰিছিল। কিন্তু সেই সকলোবোৰ জটিলতা অতিক্ৰম কৰাৰ পিছত অৱশেষত মাস্কে টুইটাৰ ক্ৰয় কৰিলে। পিছত তেওঁ নিজৰ নাম সলনি কৰি ‘এক্স’ কৰি লয়।
মাস্কে টুইটাৰৰ নীলা চৰাইটোক অঁতৰাই দিছিল। ইপিনে মাস্কে ২০২৩ চনৰ জুলাই মাহত নিজৰ নতুন এআই কোম্পানীটো আৰম্ভ কৰিছিল। নাম দিয়ে – ‘এক্সএআই’। মাস্কে গুগলৰ ‘ডিপমাইণ্ড’, মাইক্ৰ’ছফ্ট, আৰু টেছলাৰ বিষয়াসকলক এক্সএআইত আনি নিযুক্তি দিছিল।
