এইবাৰ দেখা যাব পাৰে মুকেশ আম্বানী বনাম এলন মাস্কৰ দুৰ্বাদল প্ৰতিদ্বন্দিতা। দেশ তথা এছিয়াৰ আটাইতকৈ চহকী ধনকুবেৰ আম্বানীৰ সমুখত প্ৰত্যাহ্বান হিচাপে থিয় দি উঠিব বিশ্বৰ অন্যতম শীৰ্ষস্থানীয় ধনকুবেৰ এলন মাস্ক।
ইয়াৰ কাৰণ হৈছে ভাৰতত ইণ্টাৰনেট সেৱা আৰম্ভণি কৰিবলৈ এলন মাস্কৰ আমেৰিকাস্থিত সংস্থা ‘ষ্টাৰলিংক’-এ আবেদন কৰিছে। বৰ্তমানলৈকে ভাৰত চৰকাৰৰ পৰা ষ্টাৰলিংকে অনুজ্ঞাপত্ৰ লাভ কৰা নাই। কিন্তু ভাৰতত ব্যৱসায়িক সাম্ৰাজ্য বিস্তাৰণ কৰিবলৈ পুৰোদ্যমে চেষ্টা চলাইছে এলন মাস্কে।
এই প্ৰসংগত ষ্টাৰলিংকৰ ভাৰত শাখাৰ পৰা জনোৱা হৈছে যে কোনো বাধা-বিঘিনিৰ সন্মুখিন নহ’লে ২০২২ চনৰ ৩১ জানুৱাৰীৰ ভিতৰতে এই অনুজ্ঞাপত্ৰ লাভ কৰাৰ আশা কৰা হৈছে। জানিব পৰা মতে, ২০২২ চনৰ ডিচেম্বৰ মাহৰ ভিতৰত ভাৰতৰ গ্ৰাম্য অঞ্চলসমূহত ইণ্টাৰনেট সেৱা সম্প্ৰসাৰণ কৰাৰ লক্ষ্য লৈছে এলন মাস্কৰ এই সংস্থাটোৱে।
ইয়াৰ পাছতে এই বিষয়ে দেশৰ ব্যৱসায়িক মহলত ব্যাপক চৰ্চা চলিছে। বৰ্তমান দেশত অন্যান্য টেলিকম সংস্থাসমূহতকৈ আগবাঢ়ি আছে আম্বানীৰ জিঅ’ই। দেশৰ শাসনাধিষ্ঠি বিজেপি চৰকাৰেও আম্বানীৰ জিঅ’ক ব্যাপক পৃষ্ঠপোষকতা কৰি আহিছে।
কিন্তু এতিয়া যিহেতু ভাৰতৰ গ্ৰাম্যাঞ্চলকে ধৰি সকলো অঞ্চলকে এলন মাস্কৰ ষ্টাৰলিংকে লক্ষ্য কৰি লৈছে, সেয়ে প্ৰশ্ন উঠিছে যে অত্যাধুনিক প্ৰযুক্তিসম্পন্ন ‘ষ্টাৰলিংক’ৰ সমুখত তিষ্ঠি থাকিব পাৰিবনে আম্বানীৰ ‘জিঅ’ই?
