অচিৰেই বিশ্ববাসীৰ আগত পৃথিৱীৰ বৃহত্তম নদীদ্বীপ মাজুলী এৰী বস্ত্ৰ শিল্পৰ দ্বীপ হিচাপে চিনাকী লাভ কৰিব । ব্ৰহ্মপুত্ৰৰ বুকুৰ নদীদ্বীপক এৰী শিল্পজাত সামগ্ৰী ব্ৰেণ্ড ৰূপে গঢ়ি তুলিবলৈ কেইগৰাকীমান লোকে অব্যাহত ৰাখিছে নিৰলস প্ৰচেষ্ঠা। মুগা শিল্পই শুৱালকুছিক বিশ্ব দৰবাৰত প্ৰতিষ্ঠা কৰাৰ দৰে এৰী শিল্পযোগে মাজুলীক অদ্বিতীয় স্থান ৰূপে গঢ়ি তুলিবলৈ আগবাঢ়ি আহিছে মাজুলীৰ উদিয়মান শিক্ষিত যুৱক ৰজনীকান্ত বৰদলৈ আৰু তিনিচুকীয়াৰ অংগনা বৰদলৈ।
মাজুলীৰ এৰী শিল্পৰ এক গৌৰৱময় ইতিহাসৰ লগতে এৰি পলু পুহিব পৰা সুন্দৰ পৰিবেশ আছে । এই শিল্পক পুনৰুদ্ধাৰৰ কৰাৰ বাবে মহিলা সকলক লগত লৈ এক বিপ্লৱ সাধন কৰাৰ পণ লৈ দুয়োগৰাকীয়ে ২০১৬ চনৰ পৰা মাজুলীত এৰী শিল্পৰ আন্ত:গাঠনি আৰম্ভ কৰে।
মাত্ৰ দুটা বছৰৰ নিৰলস প্ৰচেষ্টাতে এই যাত্ৰাই সোণালী বাটত ভৰি দিয়ে। শেহতীয়াভাবে বৰদলৈ এৰি মিছনে সাত সাগৰ তেৰ নদীৰ সিপাৰলৈ আমন্ত্ৰণ লাভ কৰিছে। অহা জুন মাহত আমেৰিকাত অনুষ্ঠিত হ’বলগীয়া এখন আন্তৰ্জাতিক বাণিজ্য মেলাত মাজুলীৰ এৰী কাপোৰে মাজুলীৰ তাঁত শিল্পক প্ৰতিনিধিত্ব কৰিব।
ইতিমধ্যে সেই আন্তজাৰ্তিক বাণিজ্য মেলাৰ লগত বৰদলৈ এৰী মিছনৰ এক তিনিবছৰীয়া চুক্তি চাক্ষৰ হৈছে। বাণিজ্য মেলালৈ প্ৰথম বাৰত ৫০০খন এৰি ষ্টল, এৰীৰ টেবুল ক্ল’থ, গাৰুৰ গিলিপ আৰু এৰি চাদৰ আদি প্ৰেৰণ কৰিব।
আনহাতে, চাহিদা অনুসৰি মাজুলীত সুতা উৎপাদন যিহেতু হোৱা নাই সেয়ে শিপিনিসকলক মাজুলীৰ বাহিৰৰ ঢকুৱাখনা, ঘিলামৰা, গোগামূখ, ডিমৌ, বৰহোলা আদি অঞ্চলৰ পৰা সুতা সংগ্ৰহ কৰি যোগান ধৰা হৈছে । এই মিছনত একোগৰাকী শিপিনীয়ে মাহে আঠৰ পৰা ন হাজাৰ টকালৈ উপাৰ্জন কৰিবলৈ সক্ষম হৈছে। সম্প্ৰতি বৰদলৈ এৰী মিচনত ১০০ গৰাকী শিপিনীয়ে নিতৌ বোৱা কটা অব্যাহত ৰাখিছে ।
