লোকসভাৰ সদস্য পদ হেৰুৱাব পাৰে তৃণমূল কংগ্ৰেছৰ নেত্ৰী তথা সাংসদ মহুৱা মৈত্ৰই। সূত্ৰ অনুসৰি, সংসদৰ নৈতিকতা সমিতিয়ে মহুৱা মৈত্ৰৰ লোকসভাৰ সদস্যপদ খাৰিজ কৰাৰ পৰামৰ্শ আগবঢ়াইছে।
নৈতিকতা সমিতিয়ে লগতে এই বিষয়ত ৫০০ পৃষ্ঠাজোৰা প্ৰতিবেদন প্ৰস্তুত কৰা বুলি সূত্ৰই প্ৰকাশ কৰিছে আৰু এই প্ৰতিবেদনত সমগ্ৰ বিষয়টোৰ ওপৰত নিৰ্দিষ্ট সময়ৰ ভিতৰত আইনী তদন্তৰ বাবে কেন্দ্ৰক নিৰ্দেশ দিয়া বুলিও জানিবলৈ দিছে।
মৈত্ৰৰ বিৰুদ্ধে ধনৰ বিনিময়ত সংসদত প্ৰশ্ন কৰা বুলি উত্থাপিত হোৱা অভিযোগ সন্দৰ্ভত নৈতিকতা সমিতিয়ে যোৱা ২ নৱেম্বৰত সাংসদগৰাকীক সোধা পোছা কৰিছিল।
তৃণমূল সাংসদগৰাকীয়ে ব্যৱসায়ী দৰ্শন হীৰানন্দনীৰ নিৰ্দেশত আৰু তেওঁৰ পৰা উপঢৌকন লৈ আদানী গোট আৰু প্ৰধানমন্ত্ৰী নৰেন্দ্ৰ মোদীৰ বিৰুদ্ধে সংসদত প্ৰশ্ন কৰা বুলি অভিযোগ উত্থাপন হৈছে।
এই অভিযোগক অৱশ্যে স্পষ্টভাৱে অস্বীকাৰ কৰিছে মহুৱা মৈত্ৰই। ইফালে, ২ নৱেম্বৰত সংসদৰ নৈতিকতা সমিতিয়ে সোধ-পোছৰ সময়ত অশ্লীল প্ৰশ্ন কৰা বুলি অভিযোগ তুলিছিল মৈত্ৰই।
এতিয়া, নৈতিকতা সমিতিয়ে মহুৱা মৈত্ৰৰ সাংসদ পদ খাৰিজৰ বাবে পৰামৰ্শ দিয়া বুলি সূত্ৰই প্ৰকাশ কৰাৰ পিছতে ব্যাপক ৰাজনৈতিক জল্পনা-কল্পনাৰ উদ্ভৱ হৈছে।
