দিনটোৰ জল্পনা-কল্পনাৰ অন্ত পেলাই নেপালৰ ৰাষ্ট্ৰপতিৰ কাৰ্যালয়ে ঘোষণা কৰিছে যে প্ৰাক্তন মুখ্য ন্যায়াধীশ সুশীলা কাৰ্কি দেশৰ অন্তৱৰ্তীকালীন প্ৰধানমন্ত্ৰী হ’ব আৰু নিশা ৯ বজাত শপত গ্ৰহণ কৰিব।
জেন-জেড প্ৰতিবাদকাৰী, ৰাষ্ট্ৰপতি ৰাম চন্দ্ৰ পৌডেল আৰু সেনা প্ৰধান অশোক ৰাজ ছিগডেলৰ ঐকমত্যৰ পিছতে এই সিদ্ধান্ত লোৱা হৈছে।
সূত্ৰসমূহে জনোৱা মতে, নেপালৰ প্ৰথমগৰাকী মহিলা প্ৰধানমন্ত্ৰী হৈ ইতিহাস সৃষ্টি কৰিব পৰা কাৰ্কিৰ তত্ত্বাৱধায়ক চৰকাৰত এখন সৰু মন্ত্ৰীসভা থাকিব। ইয়াৰ প্ৰথমখন বৈঠক শুকুৰবাৰে নিশা অনুষ্ঠিত হ’ব।
কেবিনেটে ফেডাৰেল সংসদৰ লগতে সাতখন প্ৰাদেশিক সংসদ ভংগ কৰাৰ পৰামৰ্শ দিয়াৰ সম্ভাৱনা আছে।
কিন্তু বৃহস্পতিবাৰে বাতৰি অনুসৰি প্ৰতিবাদকাৰীসকলৰ মাজত মতানৈক্য আছে আৰু অন্তৱৰ্তীকালীন প্ৰধানমন্ত্ৰী হিচাপে নেপালৰ বিদ্যুৎ সংকট সমাধানৰ বাবে পৰিচিত অভিযন্তা কুলমান ঘিছিঙৰ নাম উত্থাপন কৰা হৈছে।
কাঠমাণ্ডুৰ মেয়ৰ বলেন্দ্ৰ শ্বাহৰো নাম চৰ্চা হৈছিল। বেছিভাগ প্ৰতিবাদকাৰীৰ মাজত জনপ্ৰিয় শ্বাহে অৱশ্যে অন্তৱৰ্তীকালীন প্ৰধানমন্ত্ৰীৰ ভূমিকা গ্ৰহণ কৰিবলৈ আগ্ৰহী নাছিল আৰু কাৰ্কিকে সমৰ্থন জনাইছিল।
কাৰ্কি নেপালৰ প্ৰথমগৰাকী মহিলা মুখ্য ন্যায়াধীশ আছিল আৰু ২০১৬ চনৰ পৰা ২০১৭ চনলৈ কাৰ্যনিৰ্বাহ কৰিছিল।প্ৰাক্তন মুখ্য ন্যায়াধীশগৰাকীয়ে বেনাৰস হিন্দু বিশ্ববিদ্যালয়ত অধ্যয়ন কৰিছিল। ভাৰতীয় এটা সংবাদ মাধ্যমৰ সৈতে হোৱা এক সাক্ষাৎকাৰত তেওঁ কয় যে ভাৰতে নেপালক বহুত সহায় কৰিছে।
