ই ভি এম প্ৰক্ৰিয়াত বিসংগতি থকাৰ গুৰুতৰ অভিযোগ উত্থাপন কৰিছে অসম আৰক্ষীৰ প্ৰাক্তন সঞ্চালক প্ৰধান হৰেকৃষ্ণ ডেকাই। মহানগৰীৰ ১৫৫ নং লাচিত নগৰ প্ৰাথমিক বিদ্যালয়ত ভোটাধিকাৰ সাব্যস্ত কৰি অহাৰ পাছতেই সংবাদমাধ্যমৰ জৰিয়তে এই অভিযোগ উত্থাপন কৰে ডেকাই।
‘মই কেন্দ্ৰটোত প্ৰথম ভোট দিছো, চাই-মেলি বুটাম টিপিছো, কিন্তু ভি ভি পেট মেচিনত নামটো বেলেগ ওলাইছে। মই অকৰা মানুহ নহয়, মই এজন দায়িত্বশীল ভোটাৰ’। এনেদৰে উষ্মাৰে মন্তব্য কৰে ডেকাই।
আনহাতে, ভোটাধিকাৰ সাব্যস্ত কৰাৰ পাছত প্ৰাক্তন আৰক্ষী সঞ্চালক প্ৰধানগৰাকীয়ে নিৰ্বাচনী বিষয়াক ভোটতো নাকচ কৰাৰ বাবে অনুৰোধ কৰাৰ পাছত পুলিং বিষয়াই ভোট নাকচ কৰিব নোৱাৰে বুলি কোৱাৰ অভিযোগ আনে ডেকাই।
পোলিং বিষয়াগৰাকীয়ে তেওঁক দুই টকা জমা কৰি চেলেঞ্জ কৰিব পৰা ব্যৱস্থা সম্পৰ্কে কয় যদিও এই ক্ষেত্ৰত কৰা তদন্তত যদিহে তেওঁৰ অভিযোগ মিছা বুলি প্ৰমান হয় তেন্তে তেওঁৰ জৰিমনা আৰু কাৰাবাস পৰ্য্যন্ত হ’ব পাৰে বুলিও বিষয়াগৰাকীয়ে কোৱা বুলি উল্লেখ কৰে হৰেকৃষ্ণ ডেকাই।
নিৰ্বাচন আয়োগৰ ব্যৱস্থাৰ ওপৰত ক্ষোভ ব্যক্ত কৰি ডেকাই কয় যে ভোট দিবলৈ গৈ পইচাও দিব লাগিব, ই ভি এমে ভূলকৈ ৰেকৰ্ডিং কৰাৰ পাছত অভিযোগ কৰিলে আকৌ মোকে অপৰাধী সজাব।
ই ভি এমক লৈ বহুলোকে অভিযোগ কৰাৰ প্ৰসংগ উত্থাপন কৰি নিৰ্বাচনী আয়োগে নাগৰিকৰ সাংবিধানিক অধিকাৰত প্ৰতিবন্ধকতা আনিছে বুলিও মন্তব্য কৰে ডেকাই। বেলেগৰ নামত ভোট দিলে বেলেগৰ নামত পঞ্জীয়ন হোৱা ঘটনা কেতিয়াও মানি ল’ব নোৱাৰি বুলি তেওঁ কয়।
উল্লেখযোগ্য যে, নিৰ্বাচনী বিধি অনুসৰি কোনোলোকে অভিযোগ উত্থাপন কৰিলে টেণ্ডাৰ ভোট যোগে পুনৰ ভোটাধিকাৰ সাব্যস্ত কৰিব পাৰে তেনেক্ষেত্ৰত প্ৰাক্তন আৰক্ষী সঞ্চালক প্ৰধানগৰাকীয়ে ন্যায় ব্যৱস্থাৰ ওচৰ নাচাপি একমাত্ৰ অভিযোগ উত্থাপনতে সীমাবদ্ধ থকা কথাটোৱে বিশেষ তাৎপৰ্য্য বহন কৰিছে।
