অসমৰ কাছাৰ জিলাৰ আৰক্ষীয়ে এটা দশকত ৫০টাতকৈও অধিক চিজাৰিয়ান অস্ত্ৰোপচাৰ কৰা এজন চিকিৎসকক গ্ৰেপ্তাৰ কৰে।
কাষৰীয়া শ্ৰীভূমি জিলাৰ ৪৩ বছৰীয়া অভিযুক্ত পুলক মালাকাৰে কাছাৰ জিলাৰ সদৰ শিলচৰৰ এখন ব্যক্তিগত চিকিৎসালয়ত প্ৰেকটিছ কৰিছিল। প্ৰসূতি আৰু স্ত্ৰীৰোগ বিশেষজ্ঞ হিচাপে তেওঁ সুনাম গঢ়ি তুলিছিল।
আৰক্ষীয়ে জনোৱা মতে, ভুৱা এমবিবিএছ প্ৰমাণপত্ৰৰে “চিকিৎসক” হিচাপে কাম কৰা মালাকাৰে পূৰ্বে কাছাৰ, হাইলাকান্দি, আৰু শ্ৰীভূমি জিলাক সামৰি লোৱা বৰাক উপত্যকাৰ বিভিন্ন চিকিৎসালয়ত চতুৰ্থ শ্ৰেণীৰ কৰ্মচাৰী হিচাপে কাম কৰিছিল।
কাছাৰৰ জ্যেষ্ঠ আৰক্ষী অধীক্ষক নোমল মাহাত্তই কয় যে ৩ আগষ্টত অভিযুক্তক গ্ৰেপ্তাৰ কৰি পিছদিনা স্থানীয় আদালতত হাজিৰ কৰোৱা হৈছিল। আদালতে তেওঁক ছয় দিনৰ বাবে আৰক্ষীৰ ৰিমাণ্ডলৈ প্ৰেৰণ কৰে।
মাহাত্তই কয়, ‘আমি লোকজনে ভুৱা ডিগ্ৰী ব্যৱহাৰ কৰি ৰোগীৰ চিকিৎসা কৰাৰ অভিযোগ পাইছিলোঁ।তদন্তত ওড়িশাৰ এখন চৰকাৰী চিকিৎসা মহাবিদ্যালয়ৰ পৰা তেওঁৰ প্ৰমাণ পত্ৰ ভুৱা বুলি জানিব পৰা গৈছে।’
ভাৰতীয় ন্যায় সংহিতাৰ সংশ্লিষ্ট ধাৰাত অভিযুক্তৰ বিৰুদ্ধে গোচৰ ৰুজু হোৱা বুলি উল্লেখ কৰি তেওঁ কয়, ‘আমি জানিব পাৰিলোঁ যে ২০১৬ চনৰ পৰাই তেওঁ শিলচৰত চিকিৎসক হিচাপে কাম কৰিবলৈ ভুৱা ডিগ্ৰী ব্যৱহাৰ কৰি আছে।’
