প্ৰতিবছৰে অনুষ্ঠিত হৈ থকা ঢকুৱাখানাৰ ঐতিহাসিক ফাট বিহু এইবাৰো প্ৰতিকূল বতৰক নেওচি শুকুৰবাৰৰ পৰা উলহ-মালহেৰে আৰম্ভ হয়। বিহুৰ লগত সংগতি ৰাখি ফাট বিহু চাবলৈ যোৱা অতিথি সকলক আদৰিবলৈ ঢকুৱাখানা বাসীয়ে বিধে বিধে পিঠা-পনা, দৈ, জলপান আদি সাজু কৰি থৈছে।
এতিয়া ঢকুৱাখানাৰ মহঘুলি চাপৰিত কেবল বিহু গীত আৰু বিহুৰ উন্মাদনা। শুকুৰবাৰে পতাকা উত্তোলনেৰে অনুষ্ঠানৰ শুভাৰম্ভণি কৰে ফাট বিহু সমিতিৰ সভাপতি প্ৰদীপ চামুৱাই। ফাট বিহুৰ লগত সংগতি ৰাখি অনুষ্ঠিত কৰা মঞ্চ বিহু, টকা বিহু, চেমনীয়া বিহু হুঁচৰি প্ৰতিযোগিতা উদ্বোধন কৰে ক্ৰমে ঢকুৱাখানা মহাবিদ্যালয়ৰ অৱসৰ প্ৰাপ্ত অধ্যক্ষ ড০ গিৰীণ গগৈ, নীলাক্ষি দিহিংগীয়া দাস আৰু মাজুলীৰ কোষাগাৰৰ ভাৰপ্ৰাপ্ত গাণনিক পৱিত্ৰ মেধিয়ে।
শনিবাৰে ৰাতিপুৱা কপৌফুল আৰু বৃক্ষৰোপন কাৰ্যসূচীৰে দিনটোৰ অনুষ্ঠান মুকলি হোৱাৰ পাছত গামোচা প্ৰতিযোগিতা, পূৰ্ণবয়স্ক হুঁচৰি প্ৰতিযোগিতা অনুষ্ঠিত কৰা হয়। পূৰ্ণবয়স্ক হুঁচৰি বিহু উদ্বোধন কৰে জ্যোতি চিত্ৰবনৰ পৰিচালনা সমিতিৰ সদস্য ডাঃ ভূপেন কামানে।
আনহাতে, ফাট বিহুৰ লগত সংগতি ৰাখি প্ৰতিবছৰে প্ৰকাশ কৰি অহা ফাট বিহুৰ বছৰেকীয়া প্ৰকাশ ‘বিহুৱান’ উন্মোচন কৰে ডিব্ৰুগড় বিশ্ববিদ্যালয়ৰ সমাজশাস্ত্ৰ বিভাগৰ অধ্যাপক ড০ জ্যোতিপ্ৰসাদ শইকীয়াই।
উল্লেখযোগ্য যে, প্ৰতিবছৰে বহাগ মাহৰ শেষৰ ফালে ঢকুৱাখানাত ফাট বিহু উদযাপন কৰি অহা হৈছে। ফাট বিহুত বিভিন্ন জাতি-জনগোষ্ঠীৰ বিহুৰ পৰিবেশনে সমগ্ৰ অঞ্চলটোক জাতি-জনগোষ্ঠীৰ মিলন ভূমিত পৰিণত কৰে।
