চিকিৎসা জগতত এক যুগান্তকাৰী ঘটনা! এইবাৰ ৰবটে জন্ম দিলে এটি মানৱ শিশুৰ! কৃত্ৰিম বুদ্ধিমত্তা (AI) আৰু ৰবটিক্সৰ দ্বাৰা পৰিচালিত সম্পূৰ্ণ স্বয়ংক্ৰিয় আইভিএফ পদ্ধতিৰ জৰিয়তে বিশ্বৰ প্ৰথমটো শিশুৰ জন্ম হৈছে।
নিউয়ৰ্ক আৰু গুৱাডালাজাৰা ভিত্তিক এটা জৈৱ প্ৰযুক্তি প্ৰতিষ্ঠানে এই বিশাল ঐতিহাসিক পৰিঘটনাটো সম্ভৱ কৰি তুলিবলৈ সক্ষম হৈছে। এই বৈপ্লৱিক ব্যৱস্থাটোৱে সমগ্ৰ ইন্ট্ৰাচাইট’প্লাজমিক শুক্ৰাণু বেজী (ICSI) প্ৰক্ৰিয়াটোক স্বয়ংক্ৰিয় কৰি তোলে, যিটো দশক দশক ধৰি আইভিএফ চিকিৎসাৰ মূল ভেটি হৈ আহিছে।
এই ৰবটিক পদ্ধতিৰে আইভিএফৰ জৰিয়তে প্ৰথমবাৰৰ বাবে এটা ডিম্বানু আৰু এটা একক শুক্ৰাণু কোষৰ মিলন সম্ভৱ হৈছে। ৰিপ্ৰডাক্টিভ বায়’মেডিচিন অনলাইনত প্ৰকাশিত কেছ ৰিপৰ্ট অনুসৰি এই ৰবটিক আইভিএফৰ পিছত এটা মানৱ শিশু সুস্থ হৈ জন্ম হৈছে। আইভিএফৰ জৰিয়তে মাতৃ হ’ল এগৰাকী ৪০ বছৰীয়া মহিলা।
এআইৰ সহায়ত আইচিএছআইৰ দ্বাৰা চিকিৎসা কৰা পাঁচটা ডিম্বানুৰ ভিতৰত চাৰিটা ডিম্বানু সফলতাৰে নিষিক্ত হৈছিল। এআইৰ ব্যৱহাৰে কেৱল বেজী দিয়াই নহয়, শুক্ৰাণু নিৰ্বাচন আৰু স্থিতিশীলতাতো সহায় কৰিছে। এআইয়ে শ্ৰেষ্ঠ শুক্ৰাণু কোষটো চিনাক্ত কৰে, ইয়াক স্থিৰ কৰি ৰাখিবলৈ লেজাৰ ব্যৱহাৰ কৰি ডিম্বানু নিষিক্ত কৰাত সহায় কৰিছে। আৰু গোটেই কামটো এআইৰ দ্বাৰা নিখুঁতভাৱে কৰা হৈছে।
পাঁচটা ডিম্বানু নিষিক্ত কৰা বাবে মুঠ ১১৫ টা পৰ্যায় প্ৰয়োগ কৰা হয়। প্ৰতিটো ডিম্বানু লোৱাৰ গড় সময় আছিল ১০ মিনিটৰো কম, যিটো পৰীক্ষামূলক প্ৰকৃতিৰ বাবে গতানুগতিক আইচিএছআইতকৈ অলপ বেছি। কিন্তু ভৱিষ্যতে পুনৰাবৃত্তিসমূহ যথেষ্ট দ্ৰুত হোৱাৰ আশা কৰা হৈছে।
কনচিভেবলৰ মুখ্য বৈজ্ঞানিক বিষয়া তথা ভ্ৰূণ বিজ্ঞানৰ অগ্ৰণী ডাঃ জেক কোহেনে কয় যে এই প্ৰযুক্তিয়ে লেবৰ কৰ্মচাৰীৰ মানসিক চাপ হ্ৰাস কৰিব পাৰে আৰু সম্ভাৱনাময়ভাৱে ডিম্বানুৰ জীয়াই থকাৰ ক্ষমতা আৰু আইভিএফৰ সামগ্ৰিক সফলতাৰ হাৰ দুয়োটাতে উন্নতি সাধন কৰিব পাৰে।
কনচিভেবলৰ সহ-প্ৰতিষ্ঠাপক ড° আলেজান্দ্ৰ’ চাভেজ-বাডিঅ’লাই এই বিকাশক আইচিএছআই পদ্ধতিৰ প্ৰতিটো উপাদান স্বয়ংক্ৰিয় কৰিব পৰা প্ৰথমটো ব্যৱস্থা বুলি বৰ্ণনা কৰিছে।
