অৱশেষত এক অপ্ৰত্যাশিত খবৰে অসমৰ ৰাজনীতিত আলোড়নৰ সৃষ্টি কৰিছে।
প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই ২০২১ বৰ্ষৰ অসম বিধানসভা নিৰ্বাচনত প্ৰতিদ্বন্দ্বিতা নকৰে।
সোমবাৰে নিশা সংবাদ মাধ্যমৰ আগত এই কথা প্ৰকাশ কৰে প্ৰাক্তন মুখ্যমন্ত্ৰীগৰাকীৰ পত্নী ডঃ জয়শ্ৰী গোস্বামী মহন্তই।
উল্লেখ্য যে অগপই প্ৰাক্তন মুখ্যমন্ত্ৰী মহন্তৰ সমষ্টি বঢ়মপুৰক বিজেপিক প্ৰতিদ্বন্দ্বিতাৰ বাবে এৰি দিয়ে। ইয়াৰ পিছতে ৰাজ্যৰ ৰাজনীতিত ধুমুহাৰ সৃষ্টি হৈছিল আৰু দিল্লীত চিকিৎসাধীন হৈ থকা প্ৰাক্তন মুখ্যমন্ত্ৰীগৰাকী পৰিয়ালৰ সৈতে গুৱাহাটী উপস্থিত হয়।
গুৱাহাটী উপস্থিত হৈয়ে প্ৰাক্তন মুখ্যমন্ত্ৰীগৰাকীয়ে অসম গণ পৰিষদ (প্ৰগতিশীল) দলক পুনৰ সক্ৰিয় কৰি কংগ্ৰেছ মহাজোঁটৰ সৈতে মিত্ৰতা স্থাপন কৰি বঢ়মপুৰৰ পৰা নিৰ্বাচনত প্ৰতিদ্বন্দ্বিতা কৰিব বুলি সংবাদ মাধ্যমত প্ৰকাশ পাইছিল।
অৱশ্যে সোমবাৰে নিশা প্ৰাক্তন মুখ্যমন্ত্ৰীগৰাকীৰ পৰিয়ালৰ তৰফৰ পৰা স্পষ্ট কৰি দিয়া হৈছে যে প্ৰাক্তন মুখ্যমন্ত্ৰীগৰাকীয়ে আগন্তুক নিৰ্বাচনত প্ৰতিদ্বন্দ্বিতা নকৰাতো প্ৰায় নিশ্চিত।
নিজে প্ৰতিষ্ঠা কৰা অগপৰ বৰ্তমানৰ নেতৃত্বই জাতিৰ স্বাৰ্থতকৈ ব্যক্তিগত স্বাৰ্থক অধিক গুৰুত্ব প্ৰদান কৰাৰ বাবে প্ৰাক্তন মুখ্যমন্ত্ৰীগৰাকীয়ে নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত গ্ৰহণ কৰা বুলি জনাইছে পত্নী জয়শ্ৰী গোস্বামী মহন্তই।
ইফালে জয়শ্ৰী গোম্বামী মহন্তই সংবাদ মাধ্যমৰ আগত অগপৰ বৰ্তমান নেতৃত্বক বিশেষকৈ অতুল বৰা, কেশৱ মহন্ত আৰু ফণীভূষণ চৌধুৰীক ক্ষুৰধাৰ সমালোচনাও কৰে।
স্মৰ্তব্য যে ১৯৮৫-৯০ আৰু ১৯৯৬-২০০১ চনলৈ দুটা কাৰ্যকালৰ বাবে অসমৰ মুখ্যমন্ত্ৰী হোৱা প্ৰফুল্ল কুমাৰ মহন্তই নগাঁৱৰ বঢ়মপুৰ বিধানসভা সমষ্টিৰ পৰা একাৰাহে সাতটা কাৰ্যকালৰ বাবে বিধায়ক হিচাপে নিৰ্বাচিত হৈ আহিছে।
