১০ কোটি টকাত সকলো সম্পত্তি বিক্ৰী কৰিবলৈ প্ৰস্তুত প্ৰাক্তন মন্ত্ৰী, কংগ্ৰেছ নেতা ছিদ্দেক আহমেদ!
মুখ্য মন্ত্ৰীৰ ভিজিলেন্স আৰু দুৰ্নীতি নিবাৰক শাখাই মঙলবাৰে কৰিমগঞ্জৰ নিলাম বজাৰৰ বাসগৃ্হত তালাচী চলোৱাৰ পিছতেই বুধবাৰে গুৱাহাটীত আহমেদে সংবাদ মাধ্যমৰ আগত কৰিছে এই ঘোষণা।
ছিদ্দেকৰ বহু হাজাৰ কোটি টকাৰ সম্পত্তি আছে বুলি মুখ্য মন্ত্ৰী সোণোৱালক ‘কোনোবাই পতিয়ন’ নিওৱাৰ বিপৰীতে তেওঁৰ সিমান সম্পত্তি নাই বুলি মত প্ৰকাশ কৰি আহমেদ এই মন্তব্য কৰিছে।
পঢ়ক এই বাতৰি : ছিদ্দেকৰ ঘৰত ভিজিলেন্সৰ দলৰ তালাচী
‘যদি কোনো লোকে মোৰ সম্পত্তি ১০ কোটি টকাত ক্ৰয় কৰিব বিচাৰে, তেন্তে মই সম্পত্তিখিনি বিক্ৰী কৰি দিম,’ সংবাদ মাধ্যমত মন্তব্য আহমেদৰ।
ভিজিলেন্সৰ তালাচীৰ আঁৰত ‘গভীৰ ৰাজনৈতিক ষড়যন্ত্ৰ’ থকা বুলি দাবী কৰি আহমেদে কয় ‘মোৰ পিছত বিজেপি দলৰ মানুহ লাগি আছে।’
মন্ত্ৰী হৈ থকাৰ সময়তো তেওঁৰ বিৰুদ্ধে মুখ্য মন্ত্ৰীৰ দুৰ্নীতি নিবাৰকৰ তদন্ত চলাৰ কথা উল্লেখ কৰি আহমেদে কয় যে কংগ্ৰেছৰ দিনটো তেওঁ দলৰে প্ৰতিদ্বন্দ্বী বৰাকৰ এগৰাকী নেতাৰ ষড়যন্ত্ৰৰ বলি হৈছিল।
প্ৰাক্তন মন্ত্ৰীগৰাকীয়ে তদন্তক ‘আদৰণি’ জনোৱাৰ লগতে এই ক্ষেত্ৰত ‘সহায়-সহযোগিতা আগবঢ়াবলৈ প্ৰস্তুত’ বুলিও সংবাদ মাধ্যমক জানিবলৈ দিয়ে।
আহমেদে লগতে কয় যে সংবাদ মাধ্যমত প্ৰকাশ পোৱাৰ দৰে তেওঁৰ চাহ বাগান নাই, ৰবৰ বাগানহে আছে।
