দেশৰ ৰাষ্ট্ৰীয় সংগীত ‘জনগণমন অধিনায়ক’ গীতটোত অসম তথা উত্তৰ-পূবক অৱহেলিত কৰাৰ অভিযোগ পূৰ্বেও এই অঞ্চলটোৰ বহু নেতাই উত্থাপন কৰিছিল।
এইবাৰ পুনৰ সেই একে অভিযোগ উত্থাপন কৰিছে প্ৰাক্তন কংগ্ৰেছ নেতা তথা ত্ৰিপুৰাৰ ৰাজ পৰিয়ালৰ সদস্য প্ৰদ্যুৎ কিশোৰ দেববাৰ্মাই।
তেওঁ ৰাষ্ট্ৰীয় সংগীতটো সংশোধন কৰাৰো দাবী তুলিছে।
দেববাৰ্মাই ৰাষ্ট্ৰীয় সংগীতটোৰ সংশোধন ঘটাই ইয়াত উত্তৰ-পূৰ্বাঞ্চলক অন্তৰ্ভুক্ত কৰাৰ দাবী তুলিছে।
নিজৰ ফেচবুক পেজত এটা প’ষ্টৰ জৰিয়তে এই দাবী উত্থাপন কৰা ত্ৰিপুৰাৰ প্ৰাক্তন প্ৰদেশ কংগ্ৰেছৰ সভাপতিগৰাকীৰ এই প’ষ্টটোৰ পাছতে বিভিন্ন মঞ্চত প্ৰতিক্ৰিয়াৰ সৃষ্টি হৈছে।
ভাৰতৰ এখন মানচিত্ৰৰ সৈতে ফেচবুকত দিয়া প’ষ্টটোত দেববাৰ্মাই লিখিছে যে ১৯১১চনত ৰচনা কৰা সংগীতটো আজি ৰাষ্ট্ৰীয় সংগীত যদিও সেই সংগীতত উত্তৰ-পূৰ্বাঞ্চলৰ উল্লেখ নথকাতো এই অঞ্চলটোৰ বাবে অপমানজনক।
উল্লেখ্য যে ইয়াৰ পূৰ্বেও অসম গণ পৰিষদৰ সাংসদ কুমাৰ দীপক দাসেও এই বিষয়টো ৰাজহুৱাভাৱে উত্থাপন কৰিছিল।
দেববাৰ্মাই উত্থাপন কৰা এই অভিযোগ পূৰ্বতে অসমৰ বহু আঞ্চলিক জাতীয়তাবাদী নেতাই উত্থাপন কৰি আহিছে।
বিশেষকৈ অসম আন্দোলনৰ সময়ত এনে অভিযোগে বিশেষ গুৰুত্ব লাভ কৰিছিল।
অসম তথা উত্তৰ-পূৰ্বাঞ্চলৰ প্ৰতি দিল্লীৰ মাহী আইৰ দৃষ্টিৰ অভিযোগ উঠাৰ সমান্তৰালকৈ ৰাষ্ট্ৰীয় সংগীতত অসম তথা উত্তৰ-পূৰ্বাঞ্চলৰ উল্লেখ নথকাক লৈ বিভিন্ন সময়ত বিভিন্নজনে প্ৰশ্নৰ অৱতাৰণা কৰি আহিছে।
এইবাৰ ত্ৰিপুৰাৰ নেতা প্ৰদ্যুৎ কিশোৰ দেববাৰ্মাই পুনৰ সেই অভিযোগেৰে নতুন বিতৰ্কৰ অৱতাৰণা কৰিছে।
