হিমন্ত বিশ্বৰ গোচৰত ইংৰাজী দৈনিক ছেণ্টিনেলৰ প্ৰাক্তন সম্পাদকক কাৰাদণ্ড

মন্ত্ৰী হিমন্ত বিশ্ব শৰ্মাই তৰা এক গোচৰত দোষী সাব্যস্ত হৈ  কাৰাদণ্ডৰ সন্মুখীন হৈছে ছেণ্টিনেল কাকতৰ প্ৰাক্তন সম্পাদক বিকাশ শৰ্মা।

কামৰূপ (মহানগৰ) জিলাৰ ন্যায়িক দণ্ডাধীশ ইউ বৰাই যোৱা ২০ মাৰ্চত সাংবাদিকগৰাকীক দোষী সাব্যস্ত কৰি এমাহৰ সাধাৰণ কাৰাৱাস আৰু ৫হাজাৰ টকাৰ জৰিমনা বিহিছে।

গুৱাহাটী টাউন ক্লাবত বৃ্হস্পতিবাৰে সংবাদমেলযোগে এই বিষয়ে জানিবলৈ দিয়ে জ্যেষ্ঠ অধিবক্তা দেৱজিত শইকীয়াই।

উত্তৰ-কাছাৰ কেলেংকাৰিৰ অভিযুক্ত আৰ এইচ খানৰ সৈতে মন্ত্ৰীজনক সাঙুৰি অখিল গগৈৰ “উদ্ধৃতি”ৰে ২০১০ চনত প্ৰকাশ কৰা এক বাতৰিৰ বাবে কাকতখনৰ তদানীন্তন সম্পাদকগৰাকী দোষী সাব্যস্ত হৈছে।

সেই বছৰৰ ২০ জুনৰ কাকতখনত “Remove 7 tainted Ministers: KMSS” শীৰ্ষক বাতৰিটোত প্ৰকাশ পাইছিল, “Talking to newsman in Guwahati today Akhil Gogoi said: The investigation Agency had got clear information that RH Khan, the prime accused of NC hills has given the luxurious cars, which he had purchased to health and family welfare Minister Himanta Biswa Sarma as a gift. (সাংবাদিকক আজি অখিল গগৈয়ে কয়: তদন্তকাৰী সংস্থাটোৱে স্পষ্ট তথ্য পাইছে যে উত্তৰ-কাছাৰ পাৰ্বত্যৰ মূল অভিযুক্ত আৰ এইচ খানে তেওঁ কিনা বিলাসী বাহনসমূহ স্বাস্থ্য আৰু পৰিয়াল কল্যাণ মন্ত্ৰী হিমন্ত বিশ্ব শৰ্মাক উপহাৰ হিচাপে প্ৰদান কৰিছে।)”

কৃষক মুক্তি সংগ্ৰাম সমিতিৰ নেতাজনে কাকতখনে প্ৰকাশ কৰা ধৰণেৰে সংবাদমেলত মন্তব্য কৰা নাছিল বুলি আদালতত সাক্ষ্য দিয়ে।

কাকতখনে সাক্ষী হিচাপে আন এখন কাকত অসমীয়া প্ৰতিদিনৰ সম্পাদক নিত্য বৰাকো হাজিৰ কৰোৱাইছিল। কিন্তু একেখন সংবাদমেলক লৈ অসমীয়া প্ৰতিদিন আৰু ছেণ্টিনেল-এ প্ৰকাশ কৰা বাতৰি দুটাত গগৈৰ উদ্ধৃতি পৃথক আছিল। “নিত্য বৰাই আদালতত তেওঁৰ হাতত থকা তথ্য দাখিল কৰিলে। দুয়োখন কাকত গোষ্ঠীৰ বাতৰিৰ মাজত কিছু পাৰ্থক্য আছিল,” সংবাদমেলত অধিবক্তা শইকীয়াৰ মন্তব্য।

ছেণ্টিনেলৰ পূৰ্বে উল্লেখিত বাতৰিটোত প্ৰকাশিত বক্তব্য ২০ জুন, ২০১০ চনৰ অসমীয়া প্ৰতিদিনৰ “প্ৰাক্তন ৰাজ্যপাল অজয় সিং, গগৈকো তদন্তৰ আওতালৈ আনক: দাবী জনালে কৃষক মুক্তি সংগ্ৰাম সমিতিয়ে” শীৰ্ষক বাতৰিটোত প্ৰকাশ পাইছিল এই ৰূপত, “সকলোতে চৰ্চা চলি আছে যে এন আই এ তদন্তত উল্লেখ থকা মতে আৰ এইছ খানে এখন ২৫ লাখ টকীয়া বিলাসী বাহন মন্ত্ৰী হিমন্ত বিশ্ব শৰ্মাক উপহাৰ হিচাপে দিছে।”

মন্ত্ৰী শৰ্মাই তৰা অভিযোগ (নং ২৪২৬/২০১০)ত ভাৰতীয় দণ্ডবিধিৰ ৫০০/৫০১/৩৪ ধাৰাত গোচৰ ৰুজু কৰিছিল আদালতে।

সাংবাদিক শৰ্মাৰ সৈতে যোগাযোগ কৰাত তেওঁ এই সন্দৰ্ভত উচ্চ আদালতত আবেদন জনোৱাৰ পথ ল’ব বুলি নৰ্থ ইষ্ট নাও-ক জানিবলৈ দিয়ে।