প্ৰাক্তন মিছ ইণ্ডিয়াৰ ফাইনেলিষ্ট মডেল ঐশ্বৰ্য ছেৰণে UPSCৰ অসামৰিক সেৱা ২০১৯ৰ পৰীক্ষাত ৯৩সংখ্যক স্থান লাভ কৰিছে।
প্ৰকৃতাৰ্থত বিউটি উইথ দ্য ব্ৰেইন ২৩ বছৰীয়া ঐশ্বৰ্যই জানিবলৈ দিয়ে যে তেওঁৰ মাতৃয়ে মিছ ৱৰ্ল্ড ঐশ্বৰ্য ৰায়ৰ নাম অনুসৰি তেওঁৰ নামটো ৰাখিছিল।
ঐশ্বৰ্যই জানিবলৈ দিয়ে যে তেওঁৰ মাতৃয়ে তেওঁক মিছ ইণ্ডিয়া হোৱাটো বিচাৰিছিল। ২০১৬চনত ঐশ্বৰ্যই মিছ ইণ্ডিয়া ফাইনেলিষ্টৰ ২১জনৰ মাজত স্থান লাভ কৰিছিল।
২০১৪চনত ‘দিল্লী টাইমছ ফ্ৰেছ ফেচ’ৰ পৰা যাত্ৰা আৰম্ভ কৰা ঐশ্বৰ্যই মিছ ইণ্ডিয়াত অংশ গ্ৰহণ কৰাৰ পাছতে মডেলিং জগতত খোজ দিয়ে আৰু বহুকেইটা ডিজাইনাৰ তথা ফেশ্যন উইকত অংশ লয়।
ঐশ্বৰ্যই দিল্লী বিশ্ববিদ্যালয়ৰ অধীনৰ শ্ৰীৰাম কলেজ অফ কমাৰ্ছত অৰ্থনীতি বিশেষ বিষয় হিচাপে লৈ স্নাতক ডিগ্ৰী লাভ কৰে।
অধ্যয়নতো মেধাৰ পৰিচয় দিয়া ঐশ্বৰ্যই মডেলিঙৰ লগতে শৈক্ষিক দিশতো উৎকৰ্ষতাৰ পৰিচয় দিছে।
নিজৰ কামৰ পৰা প্ৰায় দুবছৰ ছুটী লৈ তেওঁ UPSCৰ পৰীক্ষাৰ বাবে প্ৰস্তুতি লয়। কোনো আনুষ্ঠানিক প্ৰশিক্ষণৰ সহায় নোলোৱাকৈ তেওঁ ঘৰতেই নিয়মিত অধ্যয়ন কৰে।
ঐশ্বৰ্যই তেওঁৰ প্ৰস্তুতিৰ সময়ছোৱাত মোবাইল আৰু ছচিয়েল মিডিয়াক প্ৰায় দূৰতে ৰাখিছিল। মঙলবাৰে প্ৰকাশ পোৱা UPSCৰ পৰীক্ষাৰ ফলাফলৰ তালিকাত তেওঁ ৯৩সংখ্যক স্থান লাভ কৰিছে।
ঐশ্বৰ্যৰ এই সাফল্যত তেওঁৰ পৰিয়ালৰ লগতে শুভাকাংক্ষীসকলো আনন্দিত হৈ পৰিছে।
