পুনৰ দেশত সংঘটিত হৈছে ডিজিটেল এৰেষ্টৰ ঘটনা। এইবাৰ প্ৰৱঞ্চনাৰ বলি হৈছে উত্তৰ প্ৰদেশৰ এগৰাকী মডেল শিৱংকিতা দীক্ষিত। তেওঁৰ পৰা ৯৯ হাজাৰ টকা লুটি নিয়া বুলি আৰক্ষীক অভিযোগ কৰে। শিৱংকিতাই দাবী কৰে যে তেওঁক প্ৰায় ২ ঘণ্টা ধৰি ডিজিটেল এৰেষ্টত ৰখা হৈছিল। ইয়াৰ উপৰিও তেওঁ প্ৰাক্তন মিছ ইণ্ডিয়া।
মডেলগৰাকীয়ে আৰক্ষীক জনোৱা মতে, যোৱা মঙলবাৰে তেওঁৰ এটা হোৱাটছএপ কল আহিছিল। তেওঁক মানৱ সৰবৰাহ আৰু ড্ৰাগছ চক্ৰৰ সৈতে জড়িত বুলি কোৱা হয়। আৰু এই সম্পৰ্কীয় অবৈধ ধন তেওঁৰ বেংক একাউণ্টত জমা হৈছে।
শিৱংকিতাক চিবিআই বিষয়া বুলি পৰিচয় দি কোনোবাই ফোন কৰিছিল। তেওঁ দাবী কৰে যে যদি তেওঁ ৯৯ হাজাৰ টকা দিয়ে তেন্তে তেওঁক মুকলি কৰি দিব পাৰিব। শিৱংকিতাই ভয় খাই টকাখিনি ট্ৰেন্সফাৰ কৰিলে।
ইয়াৰ পিছত যেতিয়া কথাটো তেওঁৰ পৰিয়ালক কোৱা হয়, তেতিয়া মডেলগৰাকীয়ে বুজি পায় যে তেওঁক প্ৰতাৰণা কৰা হৈছে। লগে লগে তেওঁ আৰক্ষীৰ ওচৰত গোচৰ ৰুজু কৰে। ইতিমধ্যে আৰক্ষীয়ে ঘটনাৰ তদন্ত আৰম্ভ কৰিছে।
যোৱা কেইমাহমানত ডিজিটেল এৰেষ্টৰ সংখ্যা বৃদ্ধি পাইছে। দুই এটা ফোন কল আৰু ভিডিঅ’ কলৰ জৰিয়তে মানুহক প্ৰতাৰণা কৰা হৈছে। কেইবা হাজাৰৰ পৰা লাখ, কোটি টকা পৰ্যন্ত হেৰুৱাব লগা হৈছে। ইতিমধ্যে কেন্দ্ৰীয় চৰকাৰে এক সজাগতা অভিযান আৰম্ভ কৰিছে। অজ্ঞাত ফোন নম্বৰৰ পৰা ফোন বা ভিডিঅ’ কল লাভ কৰাৰ সময়ত সাৱধান হ’বলৈ কোৱা হৈছে। সন্দেহ হ’লে আৰক্ষীক খবৰ দিবলৈ কোৱা হৈছে। কিন্তু কোনো লাভ হোৱা নাই।
শেহতীয়াকৈ কেন্দ্ৰীয় চৰকাৰে চাইবাৰ জালিয়াতি ৰোধৰ বাবে কঠোৰ পদক্ষেপ গ্ৰহণ কৰিছে। বন্ধ কৰা হৈছে ৫৯ হাজাৰ হোৱাটছএপ একাউণ্ট। কেৱল সেয়াই নহয়, ১৭০০ স্কাইপ আইডি বন্ধ কৰাৰ সিদ্ধান্তও লৈছে কেন্দ্ৰই। এইবোৰৰ পৰা প্ৰৱঞ্চনা কৰাৰ সম্ভাৱনা বেছি কাৰণে চৰকাৰে বাতিল কৰিছে।
আন এক তথ্য পোহৰলৈ আহিছে যে চলিত বৰ্ষৰ ১৫ নৱেম্বৰলৈকে চাইবাৰ জালিয়াতিৰ অভিযোগৰ ভিত্তিত কেন্দ্ৰীয় চৰকাৰে ১ লাখ ৩০ হাজাৰৰো অধিক আইএমইআই নম্বৰ থকা প্ৰায় ৭ লাখ চিম কাৰ্ড ব্লক কৰি ৰাখিছে।
