পাকিস্তানৰ প্ৰাক্তন প্ৰধানমন্ত্ৰী তথা বিৰোধী দল পাকিস্তান তেহৰিক-ই-ইনছাফৰ প্ৰতিষ্ঠাপক ইমৰাণ খানক শান্তিৰ নোবেল বঁটাৰ বাবে মনোনীত কৰা হৈছে।
এই মনোনয়ন তেওঁৰ কাৰ্যকালত মানৱ অধিকাৰ আৰু গণতন্ত্ৰৰ ওপৰত কৰা কামৰ স্বীকৃতি স্বৰূপে দিয়া হৈছে। এই তথ্য প্ৰকাশ কৰিছে তুৰ্কীৰ সংবাদ মাধ্যম আনাডোলুৱে। শনিবাৰে পুৱাই পাকিস্তান বিশ্ব মিত্ৰজোঁটে এই ঘোষণা কৰে।
২০২৪ চনৰ ডিচেম্বৰ মাহত প্ৰতিষ্ঠা হোৱা পিডব্লিউএ হৈছে এটা এডভোকেচি গ্ৰুপ। ইয়াৰ সদস্যসকল নৰৱেৰ ৰাজনৈতিক দল পাৰ্টিয়েট চেণ্ট্ৰামৰ সৈতে জড়িত। পাৰ্টিয়েট চেণ্ট্ৰমে ছ’চিয়েল মিডিয়াত এক পোষ্টযোগে কয় যে আমি ঘোষণা কৰি আনন্দিত হৈছো যে, নোবেল বঁটাৰ বাবে মনোনীত হোৱাৰ অধিকাৰ থকা ব্যক্তিজনৰ সৈতে মিত্ৰতা কৰি আমি পাকিস্তানৰ প্ৰাক্তন প্ৰধানমন্ত্ৰী ইমৰাণ খানক মানৱ অধিকাৰ আৰু গণতন্ত্ৰৰ ওপৰত কৰা কামৰ বাবে মনোনীত কৰিছো।
ইয়াৰ পূৰ্বে ২০১৯ চনত ইমৰাণ খানে দক্ষিণ এছিয়াত শান্তি প্ৰতিষ্ঠাৰ বাবে কৰা প্ৰচেষ্টাৰ বাবে শান্তিৰ নোবেল বঁটাৰ বাবে মনোনীত হৈছিল। নৰৱেৰ নোবেল কমিটীয়ে প্ৰতি বছৰে এশৰো অধিক মনোনয়ন লাভ কৰে। ইয়াৰ পৰা আঠ মাহৰ দীঘলীয়া প্ৰক্ৰিয়াৰে বিজয়ীক বাছনি কৰা হয়।
২০২৩ চনৰ আগষ্ট মাহৰ পৰা কাৰাগাৰত বন্দী হৈ থকা ইমৰাণ খানক ২০২২ চনৰ এপ্ৰিল মাহত অনাস্থা ভোটত অপসাৰণ কৰা হৈছিল। যোৱা জানুৱাৰীত তেওঁক ক্ষমতাৰ অপব্যৱহাৰ আৰু দুৰ্নীতিৰ গোচৰত ১৪ বছৰৰ কাৰাদণ্ড বিহা হয়। তেওঁৰ বিৰুদ্ধে এইটো চতুৰ্থটো বৃহৎ গোচৰ য’ত তেওঁ দোষী সাব্যস্ত হৈছে।
ইয়াৰ পূৰ্বে আদালতে ৰাষ্ট্ৰীয় উপহাৰ বিক্ৰী, ৰাষ্ট্ৰীয় গোপনীয়তা তথ্য ফাদিল, অবৈধ বিবাহ আদি তিনিটা গোচৰত দিয়া শাস্তি বাতিল বা স্থগিত ৰাখিছে। অৱশ্যে তেওঁৰ বিৰুদ্ধে উত্থাপিত সকলো অভিযোগ তেওঁ ৰাজনৈতিক উদ্দেশ্যপ্ৰণোদিত বুলি দাবী কৰি আহিছে।
