মণিপুৰৰ হিংসাত্মক পৰিস্থিতিক লৈ সমগ্ৰ দেশ উদ্বিগ্ন। দুটা জনগোষ্ঠীৰ মাজত হোৱা যুঁজৰ ফলত শতাধিক সাধাৰণ নাগৰিকে প্ৰাণ হেৰুৱাইছে। কিছুদিন পূৰ্বে মণিপুৰত দুগৰাকী মহিলাৰ উলংগ হৈ খোজ কঢ়োৱাৰ ভিডিঅ’ ছ’চিয়েল মিডিয়াত ভাইৰেল হৈছিল। ইয়াক লৈ উত্তাল হৈ পৰিছে দেশ।
এইবাৰ মণিপুৰৰ কাকটিং জিলাৰ ছেৰউ গাঁৱত এগৰাকী স্বাধীনতা সংগ্ৰামীৰ বৃদ্ধা পত্নীক জ্বলাই দিয়াৰ ঘটনা পোহৰলৈ আহে। শেহতীয়াকৈ কিছুদিন পূৰ্বে সংঘটিত এই ঘটনা সন্দৰ্ভত ছেৰই আৰক্ষী থানাত এজাহাৰ দাখিল কৰা হৈছে। স্বাধীনতা সংগ্ৰামীগৰাকীক ভাৰতৰ প্ৰাক্তন ৰাষ্ট্ৰপতি প্ৰয়াত এ পি জে আব্দুল কালামে বঁটা প্ৰদান কৰিছিল।
ইম্ফলৰ পৰা ৪৫ কিলোমিটাৰ নিলগৰ ছেৰউ গাঁওখন প্ৰাকৃতিকভাৱে অতি মনোৰম আছিল। কিন্তু এতিয়া তালৈ গ’লে দেখা কেবল জ্বলি যোৱা আৰু ভঙা ঘৰবোৰ। গুলীৰ চিনো সকলো ঠাইতে দেখা যায়। গাঁৱৰ অধিকাংশ লোক এতিয়াও গাঁৱৰ বাহিৰত।
লগতে পঢ়ক: ”আমি চোৰ ধৰো আৰু তেওঁলোকে উৎকোচ লৈ মুকলি কৰি দিয়ে’’- ঘাইপথত শুই প্ৰতিবাদ হোমগাৰ্ডৰ
এছ চন্দ্ৰচুড় সিং এই গাঁৱতে বাস কৰিছিল। তেওঁ আছিল স্বাধীনতা সংগ্ৰামী। চন্দ্ৰচুড়ৰ মৃত্যু হ’ল যদিও পত্নী ইবেটম্বী সেই গাঁৱতে বাস কৰিছিল।
মণিপুৰত হিংসা আৰম্ভ হোৱাৰ পাছত ২৮ মে’ত এই গাঁওখনৰ পৰিস্থিতি ভয়াৱহ হৈ পৰে। গুলী আৰু বোমাৰ শব্দই গোটেই অঞ্চলটো জোকাৰি যায়। জ্বলি থকা ঘৰবোৰলৈ চাই এক যুদ্ধভূমিৰ দৃশ্য দেখা যেনেই লাগিছিল। সেইদিনা স্বাধীনতা সংগ্ৰামীগৰাকীৰ ঘৰত অস্ত্ৰধাৰী দল এটাই আক্ৰমণ কৰে। ঘৰৰ দুৱাৰখন বাহিৰৰ পৰা তলা লগাই জুই লগাই দিয়া হয়। গুলীচালনাও কৰা হৈছিল। ইয়াৰ বাবেই স্বাধীনতা সংগ্ৰামীগৰাকীৰ পত্নীৰ অগ্নিদগ্ধ হৈ মৃত্যু হয়।
সেইদিনাৰ ঘটনা মনত পৰিলে এতিয়াও উত্তেজিত হৈ পৰে ২২ বছৰীয়া প্ৰেমকান্ত। প্ৰেমকান্ত মৃত ইবেতম্বীৰ নাতি। তেওঁলোকৰ ঘৰত হোৱা আক্ৰমণৰ সন্দৰ্ভত তেওঁ কয়, “আমাৰ ঘৰত আক্ৰমণৰ পিছতে আইতাই কৈছিল এতিয়া পলাই যোৱা। পিছত ঘুৰি আহি চাবা কি হ’ল। ইয়াৰ পিছত আমি পলাই আহিলোঁ। তাৰ পিছত ঘৰটোত জুই লগাই দিলে। পলাই গৈ থাকোঁতে মোৰ ভৰি আৰু হাতত গুলী লাগিছিল।”
লগতে পঢ়ক: স্মৰণীয়-বৰণীয়: যিবোৰ কথাই আমাক প্ৰকৃত মানুহ হিচাপে গঢ়ি উঠাত ‘বিশুদ্ধ অক্সিজেন’ দিয়ে
প্ৰেমকান্তই সংবাদ মাধ্যমৰ প্ৰতিনিধিৰ সন্মুখতো গুলীৰ চিন দেখুৱাইছিল। জ্বলি যোৱা ঘৰৰ ভিতৰৰ পৰা এ পি জে আব্দুল কালামৰ পৰা তেওঁ ককাকে বঁটা লাভ কৰাৰ ফ্ৰেমযুক্ত ফটোও পাইছে। সেই ফটোখন সংবাদ মাধ্যমৰ প্ৰতিনিধিক দেখুৱাই কান্দোনত ভাগি পৰে মণিপুৰী যুৱকজন।
