বলীউডৰ অভিনেত্ৰী বৰখা মদনক হয়তো মনত আছে আপোনাৰ। কেৱল বলীউডতে নহয়, এসময়ত এইগৰাকী অভিনেত্ৰীয়ে হিন্দী ধাৰাবাহিকতো অভিনয় কৰিছিল। মিছ ইণ্ডিয়া প্ৰতিযোগিতাত সুস্মিতা সেন আৰু ঐশ্বৰ্য ৰায়ৰো প্ৰতিদ্বন্দী আছিল এইগৰাকী বৰখা মদন।
৯০ দশকত মিছ ইণ্ডিয়া প্ৰতিযোগিতাত তৃতীয় ৰানাৰ্ছ আপ আছিল বৰখা মদন। ইয়াৰ পিছত তেওঁৰ বাবে মুকলি হৈছিল বলীউডৰ দুৱাৰ । খুব কম সময়ৰ ভিতৰতে ধন, সফলতা, খ্যাতি, প্ৰতিপত্তি অৰ্জন কৰিবলৈ আৰম্ভ কৰিছিল বৰখাই। এসময়ত তেওঁ মডেলিঙৰ জগতখনতো আছিল খুবেই জনপ্ৰিয়। কিন্তু এই সকলো ত্যাগ কৰি এতিয়া তেওঁ এগৰাকী বৌদ্ধ ভিক্ষুক।
১৯৯৬ চনত অক্ষয় কুমাৰ আৰু ৰবীনা টেণ্ডনৰ সৈতে ‘খিলাৰীও কা খিলাৰী’ ছবিত অভিনয় কৰিছিল বৰখাই। এইখনেই আছিল তেওঁৰ প্ৰথমখন ছবি। তাৰ পিছত তেওঁ পৰিচালক ৰামগোপাল বৰ্মাৰ ছবি ‘ভূত’ত অজয় দেৱগন আৰু উৰ্মিলা মাতেন্দকাৰৰ সৈতে অভিনয় কৰাৰ সুযোগ লাভ কৰিছিল।
কিন্তু দিন বাগৰি যোৱাৰ পিছতো অভিনয়ৰ জগতখনত নিজকে সম্পূৰ্ণৰূপত প্ৰতিষ্ঠা কৰিব পৰা নাছিল বৰখাই। বৰখাই বলিউডত নিজৰ স্থান সুৰক্ষিত কৰাৰ সময়লৈ তেওঁৰ একালৰ প্ৰতিদ্বন্দী তথা একেলগে যাত্ৰা আৰম্ভ কৰা সুস্মিতা সেন আৰু ঐশ্বৰ্য ৰায় হৈ পৰিছিল আন্তঃৰাষ্ট্ৰীয় খ্যাতিসম্পন্ন তাৰকা।
তাৰ পিছত বৰখাই প্ৰৱেশ কৰে টেলিভিছন জগতত। কিন্তু দিনক দিনে তেওঁৰ মানসিক অৱস্থাৰ অৱনতি ঘটিবলৈ ধৰিলে। হতাশাই আগুৰি ধৰিলে তেওঁক।
ইয়াৰ পিছত অভিনেত্ৰীগৰাকীয়ে এটা প্ৰডাকচন কোম্পানী খুলিলে। ইয়াৰ জড়িয়তে বৰখাই নিজেই ‘শ্বোচ শ্ব’ আৰু ‘ছুৰখাব’ নামৰ দুখনকৈ ছবি প্ৰযোজনা কৰিলে। ইয়াতো সফলতা লাভ নকৰিলে তেওঁ। নিজৰ ধনেৰে নিৰ্মাণ কৰা ছবি দুখনৰ পৰা বৰখাই কোনো লাভ আদায় কৰিব নোৱাৰিলে। গতিকে তাৰ পিছত তেওঁ ক্ৰমান্বয়ে গ্লেমাৰ জগতখনৰ পৰা নিজকে আঁতৰাই আনিবলৈ ধৰিলে।
ইয়াৰ মাজতে হঠাৎ এদিন বৌদ্ধ মঠ এটা পৰিদৰ্শন কৰি থাকোঁতে বৌদ্ধ ধৰ্মৰ প্ৰতি আকৰ্ষিত হৈ পৰিল তেওঁ। বৌদ্ধ ধৰ্মৰ প্ৰতি আকৰ্ষিত হৈ বৌদ্ধ ধৰ্ম গ্ৰহণ কৰিলে বৰখা মদনে। এতিয়া তেওঁৰ নতুন নাম গালটেন ছামটেন। এদৰেই মিছ ইণ্ডিয়াৰ পৰা বলিউডলৈকে এটা বৰ্ণাঢ্য জীৱনৰ মাজেৰে আহি আজি বৌদ্ধ সন্ন্যাসী হিচাপে ত্যাগৰ জীৱন কটাইছে বৰখা মদনে।
