সমগ্ৰ দেশতে গণেশ চতুৰ্থী অতি উৎসাহেৰে উদযাপন কৰা হৈছে। প্ৰতিবাৰৰ দৰে এইবাৰো মুম্বাইৰ বিভিন্ন মণ্ডপত উন্মাদনা। মহানগৰীৰ চহকী পূজাই সেই উন্মাদনাত এক নতুন ৰং সংযোজন কৰিছে। জি এছ বি সেৱা মণ্ডলে নতুন অভিলেখ গঢ়িলে। তেওঁলোকৰ পাঁচদিনীয়া উৎসৱৰ বাবে ৪০০.৫৮ কোটি টকাৰ বীমা লোৱা হৈছে। ২০২৩ চনত এই মণ্ডলে ৩৬০.৪০ কোটি টকাৰ বীমা ক্ৰয় কৰিছিল। জি এছ বি সেৱা মণ্ডলৰ পূজা অনুষ্ঠিত হৈছে ছায়নৰ কিংছ চাৰ্কলত। এই ক্ষেত্ৰত বিখ্যাত লালবাঘচা ৰাজা পূজাও বহু পিছ পৰি আছে।
এইবাৰ জি এছ বি সেৱা মণ্ডলৰ পূজাই ৭১তম বছৰত ভৰি দিছে। ইয়াত মহা গণপতি ৬৬ কেজি সোণৰ গহনা আৰু ৩২৫ কেজি ৰূপ আৰু অন্যান্য গহনাৰে সজাই তোলা হৈছে। তেওঁলোকৰ নিয়মীয়া বীমা কোম্পানী নিউ ইণ্ডিয়া এশ্বুৰেন্সে এই বীমা লৈছে। যদিও জি এছ বি সেৱা মণ্ডলে বীমা ক্ৰয়ৰ বাবে কিমান ধন দিছে সেয়া এতিয়াও জানিব পৰা হোৱা নাই।
বীমাৰ সবিশেষৰ পৰা জনা যায় যে মুঠ ৪০০.৫৮ কোটি টকাৰ বীমাৰ ভিতৰত সৰ্বাধিক ৩২৫ কোটি টকাৰ বীমা স্বেচ্ছাসেৱক, ৰান্ধনী, সেৱা কৰ্মী, ভেলেট পাৰ্কিং, নিৰাপত্তাৰক্ষী আৰু ষ্টল কৰ্মীৰ ব্যক্তিগত দুৰ্ঘটনা কভাৰৰ বাবে লোৱা হৈছে। তাৰ পাছত আছে ৪৩.১৫ কোটি টকাৰ বীমা যিয়ে সোণ, ৰূপৰ গহনা চুৰি আৰু অন্যান্য বিভিন্ন বিপদৰ পৰা সুৰক্ষা প্ৰদান কৰিব। ২ কোটি টকাৰ আন এটা ষ্টেণ্ডাৰ্ড কভাৰ আছে যিয়ে জুই আৰু বিপদৰ সৈতে মোকাবিলা কৰিব। ৩০ কোটি টকাৰ বীমাই পেণ্ডেল, ষ্টেডিয়াম আৰু ভক্তক সামৰি ল’ব। শেষত জুই আৰু অন্যান্য বিপদৰ পৰা ৰক্ষা পাবলৈ ৪৩ লাখ টকাৰ বীমা আছে।
আনহাতে, মুম্বাইৰ আন এক গুৰুত্বপূৰ্ণ পূজা লালবাঘচা ৰাজাৰ বীমা কভাৰ ৩২.৭৬ কোটি টকা। যদিও লালবাঘছা ৰাজা পূজাৰ খৰচ বৃহৎ। তেওঁলোকৰ এই উৎসৱ দহদিন ধৰি চলে। তাতে জি এছ বি সেৱা মণ্ডলৰ পূজা পাঁচ দিন চলি থাকে।
