এজন দায়িত্বশীল মন্ত্ৰীৰ আজৱ মন্তব্য। ‘গংগা মা আপোনালোকৰ দুৱাৰমুখলৈ আহিছে, ভৰি ধুৱাবলৈ। এতিয়া আপোনালোক পোনে পোনে স্বৰ্গলৈ যাব।’- উত্তৰ প্ৰদেশত বিজেপিৰ মিত্ৰ দল নিষাদ পাৰ্টিৰ সদস্য তথা মীন পালন মন্ত্ৰী সঞ্জয় নিষাদৰ এই মন্তব্যই ৰাজ্যখনত বিতৰ্কৰ সৃষ্টি কৰিছে। বানাক্ৰান্ত এলেকাৰ এগৰাকী মহিলাক সাক্ষাৎ কৰি নিষাদে এই মন্তব্য কৰে। পিছে ইয়াৰ উত্তৰত মহিলাগৰাকীৰ উত্তৰ আছিল আছিল তাৎপৰ্যপূৰ্ণ, মহিলাগৰাকীয়ে ক’লে- ‘আপুনিও আহি আমাৰ লগত কেইদিনমান থাকিব লাগে, গংগা মায়ে আপোনাৰো ভৰি ধুব।’
উল্লেখ্য যে, বাৰিষাৰ সময়ত হোৱা প্ৰবল বৰষুণৰ বাবে গংগাৰ জলপৃষ্ঠ বৃদ্ধি পাইছে। উপনৈসমূহৰ পানী উফন্দি উঠাৰ লগতে আৰু ৰাজ্যখনৰ বিভিন্ন অঞ্চলত প্ৰৱেশ কৰিছে। কানপুৰ, প্ৰয়াগৰাজ, বাৰাণসীকে ধৰি ১৭ খন জিলাত গংগা আৰু যমুনা উফন্দি উঠাৰ ফলত বানপানীৰ সৃষ্টি হৈছে। কানপুৰ ডেহাট অঞ্চলৰ বানাক্ৰান্ত অঞ্চল পৰিদৰ্শন কৰিবলৈ গৈছিল মন্ত্ৰীগৰাকী। ছ’চিয়েল মিডিয়াত মন্ত্ৰীগৰাকীৰ কথা শুনি মহিলাগৰাকীয়ে লগতে কয়, “আপুনিও সেই আশীৰ্বাদৰ কিছু অংশ লওক”। তেতিয়াৰ পৰাই বিৰোধীৰ আক্ৰমণ আৰু ঠাট্টাৰ সন্মুখীন হৈছে মহিলাগৰাকী। নিষাদে স্পষ্টীকৰণ দি কয়, ‘মই ধেমালিতে তেনেকৈ ক’লোঁ। মই দেখুৱাব বিচাৰিছিলো যে, দূৰ-দূৰণিৰ পৰা মানুহ গংগাত ডুব যাবলৈ আহে, কিন্তু এতিয়া গংগা মা নিজেই ঘৰৰ ওচৰলৈ আহিছে।’
অৱশ্যে মন্ত্ৰীগৰাকীৰ কথাৰ প্ৰতিক্ৰিয়া প্ৰকাশ কৰি ৰাজ্যখনৰ মূল বিৰোধী দল সমাজবাদী পাৰ্টিৰ মুখপাত্ৰই কয় যে, ‘প্ৰকৃত পৰিস্থিতি তেওঁ নাজানে। বানপানীত সাধাৰণ মানুহৰ দুৰ্দশা বুজিবলৈ মগজু নাই মন্ত্ৰীজনৰ। যেতিয়া ৰাজ্য চৰকাৰে সাহায্য আৰু উদ্ধাৰ কৰাত ব্যৰ্থ হয়, তেতিয়া এজন মন্ত্ৰী ফটো উঠি ঘূৰি ফুৰে।’
