জাৰ্মান গৱেষকৰ এক নতুন অধ্যয়নত দাবী কৰা হৈছে যে কৰ’না ভাইৰাছে মানুহৰ মগজুত দীৰ্ঘম্যাদী প্ৰভাৱ পেলাব পাৰে। সংক্ৰমণৰ পিছত কৰ’না ভাইৰাছ মগজুৰ খুলি আৰু মেনিনজ (মগজু আৱৰি থকা আৱৰণ)কে ধৰি বিভিন্ন অংশত বছৰ বছৰ ধৰি থাকি যাব পাৰে। ফলত আক্ৰান্ত লোকৰ মগজুৰ কাৰ্য্যক্ষমতা ৫ৰ পৰা ১০ বছৰলৈকে প্ৰভাৱিত হ’ব পাৰে। শেহতীয়াকৈ চেল হ’ষ্ট এণ্ড মাইক্ৰ’ব নামৰ আলোচনীখনত এই গৱেষণাৰ তথ্য প্ৰকাশ পাইছে।
জাৰ্মানীৰ সৰ্ববৃহৎ বৈজ্ঞানিক সংস্থা হেলমহল্টজ মিউনিখ আৰু মিউনিখত অৱস্থিত ৰাজহুৱা গৱেষণা বিশ্ববিদ্যালয় লুডৱিগ-মেক্সিমিলিয়ানছ-ইউনিভাৰ্চিটি (LMU)ৰ গৱেষকসকলে প্ৰকাশ কৰিছে যে SARS-CoV-2 ভাইৰাছৰ স্পাইক প্ৰটিন মগজুৰ সুৰক্ষামূলক স্তৰ মেনিনজিছ আৰু মূৰৰ খুলিৰ হাড়ৰ মজ্জাত ৪ বছৰলৈকে থাকি যাব পাৰে। এই প্ৰটিনৰ উপস্থিতিয়ে মগজুত দীৰ্ঘদিনীয়া প্ৰদাহ সৃষ্টি কৰে আৰু স্নায়ুৰ অৱক্ষয়ী ৰোগৰ সম্ভাৱনা বৃদ্ধি কৰে।
হেলমহল্টজ মিউনিখৰ ইনষ্টিটিউট ফৰ ইনটেলিজেণ্ট বায়’টেকন’লজিৰ সঞ্চালক অধ্যাপক এৰটুৰ্কে কয় যে দীৰ্ঘম্যাদী স্নায়ুজনিত প্ৰভাৱৰ ভিতৰত এটা হ’ল মগজুৰ বয়স বৃদ্ধি ত্বৰান্বিত হোৱা। ইয়াৰ ফলত আক্ৰান্ত ব্যক্তিৰ মগজুৰ কাৰ্য্যক্ষমতা ৫ৰ পৰা ১০ বছৰলৈ হ্ৰাস পায়। অধ্যয়নত দীৰ্ঘদিনীয়া কোভিডৰ স্নায়ুজনিত লক্ষণ, যেনে মূৰৰ বিষ, টোপনিৰ সমস্যা আৰু “মগজুৰ আছন্নতা”, বা জ্ঞানশক্তিৰ অক্ষমতা আদিও প্ৰকাশ পাইছে।
এই অধ্যয়নৰ বাবে গৱেষকসকলে নতুন এআই-চালিত ইমেজিং কৌশল উদ্ভাৱন কৰিছে, যিয়ে ভাইৰাছৰ প্ৰটিনৰ ত্ৰিমাত্ৰিক দৃশ্যমানতা সম্ভৱ কৰি তুলিছে। এই বিশেষ কৌশলৰ সহায়ত Covid-19 ৰোগী আৰু এন্দুৰৰ টিছ্যুৰ নমুনাত স্পাইক প্ৰটিনৰ উপস্থিতি ধৰা পেলোৱা হয়।
