কাম দিয়াৰ প্ৰলোভনেৰে হোটেলত যুৱতীক ধৰ্ষণ; ভিডিঅ’ ভাইৰেল কৰাৰ ভাবুকি

গোটেই দেশতে এতিয়া এটাৰ পাছত এটাকৈ সংঘটিত ধৰ্ষণৰ বাতৰিয়ে জনসাধাৰণক উদ্বিগ্ন কৰি তুলিছে।

দিল্লীৰ ছাইবাৰ চিটি হিচাপে পৰিচিত গুৰুগ্ৰামত এইবাৰ সংঘটিত হৈছে আন এক ধৰ্ষণৰ ঘটনা।

স্থানীয় থানাত ধৰ্ষণ আৰু হত্যাৰ ভাবুকি দিয়াৰ অভিযোগ এটা গোচৰ ৰুজু কৰা হৈছে।

যুৱতীগৰাকীয়ে অভিযোগ কৰা মতে, কাম দিয়াৰ প্ৰলোভনেৰে এজন ব্যক্তিয়ে তেওঁক ছেক্টৰ-৩১ত থকা এখন হোটেললৈ মাতে। তাতেই তেওঁক ধৰ্ষণ কৰা হয় বুলি অভিযোগ কৰা হৈছে।

উত্তৰ প্ৰদেশৰ ২০বছৰীয়া যুৱতীগৰাকী আঞ্চলিক নৃত্য-গীতৰ সৈতে জড়িত আছিল।

যুৱতীগৰাকীৰ অভিযোগৰ ভিত্তিত আৰক্ষীয়ে ৩৭৬ আৰু ৫০৬ধাৰাত গোচৰ ৰুজু কৰিছে। আৰক্ষীয়ে গোটেই ঘটনাৰ তদন্ত আৰম্ভ কৰিছে।

যুৱতীগৰাকীৰ অভিযোগ অনুসৰি, চলিত মাহৰ আৰম্ভণিতে ছেক্টৰ-৩১ৰ এখন হোটেললৈ প্ৰবীণ নামৰ জন ব্যক্তিৰ সৈতে তেওঁৰ সাক্ষাৎ হয়। নৃত্য-গীত সম্পৰ্কীয় কামত তেওঁ তালৈ গৈছিল।

যুৱতীগৰাকীয়ে দাবী কৰা মতে যোৱা ৬ অক্টোবৰত অভিযুক্ত ব্যক্তিগৰাকীয়ে তেওঁক এখন হোটেললৈ মাতি পঠিয়ায় আৰু তাতেই তেওঁক ধৰ্ষণ কৰি তাৰ পৰা পলাই যায়।

যুৱতীগৰাকীয়ে অভিযোগ কৰে যে তাৰ পাছৰে পৰা অভিযুক্ত ব্যক্তিগৰাকীয়ে তেওঁক ফোন কৰি উক্ত হোটেলখনলৈ আহিবলৈ হেচা দি আছে আৰু নহ’লে ধৰ্ষণৰ সেই অশ্লীল ভিডিঅ’ ছচিয়েল মিডিয়াত ভাইৰেল কৰি দিয়াৰ ভাবুকি দিছে।

আৰক্ষীয়ে বৰ্তমান অভিযুক্ত ব্যক্তিগৰাকীৰ সন্ধানত অভিযান অব্যাহত ৰাখিছে।