দুৰ্ঘটনাত আহত যুৱতীক চিকিৎসালয়তে ‘যৌন নিৰ্য্যাতন’; জে’ললৈ জি এন আৰ চিৰ কৰ্মচাৰী
দিছপুৰৰ জি এন আৰ চি চিকিৎসালয়ৰ কেবিনত ভৰ্তি কৰোৱা দুৰ্ঘটনাত আহত যুৱতী এগৰাকীক যৌন নিৰ্য্যাতন চলোৱাৰ অভিযোগত চিকিৎসালয়খনৰ হেমেন ডেকা নামৰ কৰ্মচাৰী এগৰাকীক মঙলবাৰে জে’ললৈ প্ৰেৰণ কৰা হৈছে।
দিছপুৰ আৰক্ষীয়ে সোমবাৰে সন্ধিয়া গ্ৰেপ্তাৰ কৰা ২৫ বছৰীয়া ডেকাক কামৰূপ জিলা আৰু সত্ৰ ন্যায়াধীশৰ আদালতে মঙলবাৰে জে’ললৈ প্ৰেৰণ কৰিছে বুলি নৰ্থ ইষ্ট নাও-ক জনাইছে দিছপুৰ আৰক্ষী থানাৰ উপ পৰিদৰ্শক ভাগ্য ডেকাই।
কেবিনত অকলশৰে থকা অৱস্থাত ডেকাই যৌন নিৰ্য্যাতন চলোৱা বুলি যুৱতীগৰাকীয়ে অভিযোগ তোলাৰ পিছতে সোমবাৰে সন্ধিয়া যুৱতীগৰাকীৰ পৰিয়ালৰ লোকে দিছপুৰ থানাত এজাহাৰ দাখিল কৰিছিল।
‘অভিযুক্ত ডেকাৰ বিৰুদ্ধে ভাৰতীয় দণ্ডবিধিৰ ৪৪৭, ৩৫৪ আৰু ৩৫৪চি ধাৰাৰ অধীনত এক গোচৰ (২৪০৯/ ১৮) ৰুজু কৰা হৈছে,’ জনালে উপ পৰিদৰ্শক ভাগ্য ডেকাই।
যোৱা ৮ আগষ্টত বৰপেটাৰ পাঠশালাত সংঘটিত এক পথ দুৰ্ঘটনাত গুৰুতৰভাৱে আহত হোৱা যুৱতীগৰাকী উন্নত চিকিৎসাৰ বাবে জি এন আৰ চিত ভৰ্তি কৰা হৈছিল।