গোৱালপাৰা জিলাৰ দুধনৈ আৰক্ষীয়ে শুকুৰবাৰে শংকৰদেৱ শিশু বিদ্যা নিকেতনৰ দুগৰাকী শিক্ষকক শিক্ষাৰ্থীক যৌন নিৰ্যাতন চলোৱাৰ অভিযোগত গ্ৰেপ্তাৰ কৰে।
‘’আমি জিলা শিশু সুৰক্ষা গোট (ডি চি পি য়ু)ৰ অভিযোগটো সম্পৰ্কে খবৰ লাভ কৰো আৰু সঠিক অনুসন্ধানৰ পাছত বৃহস্পতিবাৰে নিশা অভিযুক্ত শিক্ষক দুগৰাকীক গ্ৰেপ্তাৰ কৰো,’’-দুধনৈ আৰক্ষী থানাৰ ভাৰপ্ৰাপ্ত বিষয়া মুকুট কাকতিয়ে জানিবলৈ দিয়ে।
‘’শুকুৰবাৰে আমি তেওঁলোকক আদালতত হাজিৰ কৰাও। আদালতে দুয়োগৰাকীকে ন্যায়িক জিম্মালৈ প্ৰেৰণ কৰে,’-কাকতিয়ে কয়।
কাকতিয়ে লগতে জানিবলৈ দিয়ে যে দুধনৈ আৰক্ষী থানাত এই সন্দৰ্ভত ভাৰতীয় দণ্ডবিধি আৰু যৌন অপৰাধৰ পৰা শিশুৰ সুৰক্ষা আইন ২০১২ৰ অধীনত ৩৫৪/৩৫৪এ ধাৰাত এটা গোচৰ (গোচৰ নং ১২০/১৯) ৰুজু কৰা হৈছে।
অভিযোগ উত্থাপিত হোৱাৰ পাছতে দুয়োগৰাকী শিক্ষককে বিদ্যালয় পৰিচালনা সমিতিয়ে নিলম্বিত কৰিছে।
‘’আমি আমাৰ নিজৰ সূত্ৰৰ পৰা লাভ কৰা তথ্য অনুসৰি উক্ত বিদ্যালয়খনৰ এটা শ্ৰেণীৰ সকলোবোৰ ছাত্ৰীয়ে ঘটনাটো সন্দৰ্ভত তথা এই বিশেষ শিক্ষক দুগৰাকীৰ অশালীন আচৰণৰ বিষয়ে বিদ্যালয় পৰিচালনা সমিতিক আনুষ্ঠানিকভাৱে আপত্তি জনাইছিল,’’-নাম প্ৰকাশত অনিচ্ছুক ডি চি পি য়ুৰ এগৰাকী বিষয়াই নৰ্থইষ্ট নাওক জানিবলৈ দিয়ে।
‘’গোৱালপাৰা শিশু কল্যাণ সমিতিৰ (চি ডব্লিউ চি) নিৰ্দেশনাত এক অনুসন্ধান চলোৱা হৈছিল,’’বিষয়াগৰাকীয়ে কয়।
‘’আমি ঘটনাৰ বলি সকলৰ সৈতে কথা বতৰা পাতিছিলো আৰু শিশু কল্যাণ সমিতিৰ লগতে আৰক্ষী অধীক্ষকক এক প্ৰতিবেদন দাখিল কৰি উপযুক্ত ব্যৱস্থা গ্ৰহণৰ বাবে আহ্বান জনাইছিলো,’’-বিষয়াগৰাকীয়ে লগতে কয়।
‘’আমি সুখী যে আৰক্ষীয়ে সফলতাৰে অপৰাধীক কৰায়ত্ত কৰিছে,’’-সন্তুষ্টি প্ৰকাশ কৰি বিষয়াগাৰীকয়ে লগতে কয়।
‘’ছাত্ৰ-শিক্ষকৰ সম্পৰ্ক নিকটভাৱে নিৰীক্ষণ কৰা উচিত,’’-গোৱালপাৰ শিশু কল্যাণ সমিতিৰ এগৰাকী সদস্য দিবাকৰ শৰ্মাই এইদৰে মন্তব্য কৰে।
‘’বহু ঘটনা কেতিয়াও পোহৰলৈ নাহে আৰু আক্ৰান্তসকল ন্যায়ৰ পৰা বঞ্চিত হয়,’’-তেওঁ লগতে কয়।
