বৰ্তমান সময়ত সমগ্ৰ দেশৰ লগতে অসমতো চৰ্চিত এটা নাম হৈছে লাভলীনা বৰগোঁহাই। অলিম্পিকলৈ যোৱা অসমৰ প্ৰথমগৰাকী মহিলা খেলুৱৈ তথা বক্সাৰ গৰাকীক লৈ এতিয়া উৎসাহৰ অন্ত নাই অসমবাসীৰ মাজত।
বিগত সপ্তাহৰ পৰা ছ’চিয়েল মিডিয়াৰ যোগেদিয়েই হওঁক বা আন সংবাদ মাধ্যমৰ যোগেদিয়েই হওঁক অসমৰ ৰাইজে অজস্ৰ আৰ্শীবাদ-শুভেচ্ছাৰে উপচাই পেলাইছে অসম গৌৰৱ লাভলীনাক। গ’ ফৰ গ্ল’ৰী শ্ল’গানেৰে উৎসাহিত কৰিছে সকলোৱে।
গোলাঘাট বাৰমূখীয়াৰ দৰে এখন ভিতৰুৱা অঞ্চলৰ পৰা বিশ্বৰ সৰ্বশ্ৰেষ্ঠ খেল প্ৰতিযোগিতা অলিম্পিকত অংশ ল’বলৈ যোৱাটো কিমান গৌৰৱৰ কথা সেইয়া হয়তো লাভলীনাৰ গাঁৱত উপস্থিত নহ’লে অনুভৱ কৰিব নোৱাৰি।
সততে খেতি-বাতি কৰি ভালপোৱা লাভলীনাই এই পৰ্যায়ত উপনীত হ’বলৈ কিমানখিনি প্ৰত্যাহ্বানৰ সন্মুখীন হৈছিল সেইয়া হয়তো এখন অতিকৈ সাধাৰণ ঘৰৰ পৰা ওলাই যোৱা খেলুৱৈজনেহে ভালকৈ উপলব্ধি কৰিব পাৰিব।
একাগ্ৰতা আৰু লক্ষ্য স্থিৰ হ’লে যে কোনো প্ৰত্যাহ্বানে নেওচা দিব নোৱাৰে সেই কথা প্ৰমাণ কৰি অৱশেষত লাভলীনাই সপোনক বাস্তৱায়িত কৰিবলৈ ১৭ জুলাইত সুদূৰ টকিঅ’লৈ উৰা মাৰিলে।
এতিয়া সকলোৰে আশা আৰু আৰ্শীবাদ জয় হওঁক লাভলীনাৰ। পিতৃ টিকেন বৰগোঁহাই আৰু মাতৃ মামনি বৰগোঁহায়ে ছোৱালীজনীৰ বাবে বিচাৰিছে অসমবাসীৰ পৰা আৰ্শীবাদ।
পৰিতাপৰ কথা যে সমগ্র ৰাজ্যজুৰি লাভলীনাক শুভেচ্ছা আৰু আৰ্শীবাদেৰে উপচাই পেলোৱা সময়তে স্ব- গৃহ গোলাঘাটৰ ক্ৰীড়া মহলত দেখা নাই কোনো উৎসুকতা। জিলাখনত এটা বিয়াগোম ক্ৰীড়া সন্থা থকাৰ পিছতো লাভলীনাক উৎসাহ যোগাবলৈ লোৱা নাই কোনো কাৰ্যসূচী।
শেহতীয়াকৈ গোলাঘাট এমেচাৰ বক্সিং সন্থাই দুখনমান ফ্লেগ লগাই যেন সামৰিলে এই দায়িত্ব। একেদৰে গোলাঘাট জিলা ক্ৰীড়া সন্থাৰ ফালৰ পৰা আজিলৈকে লাভলীনাক লৈ কোনো উৎসাহমূলক বাৰ্তা প্ৰেৰণ কৰাও দেখা পোৱা নগ’ল।
খেলুৱৈ সৃষ্টি কৰিবলৈ গঠন হোৱা এনে অনুষ্ঠানৰ পৰা অন্তত সেইখিনি আশা গোলাঘাটবাসীয়ে কৰিছিল। যদিও লাভলীনাক লৈ কোনো ধৰণৰ পদক্ষেপ গ্ৰহণ নকৰিলে জিলা ক্ৰীড়া সন্থাই।
