যোৱা কিছুদিন ধৰি চোৰৰ মহামাৰীত ভুগিছে গাঁওবাসী। ইফালে, মাজনিশা যেতিয়া কিছুমান অদ্ভুত সা-সৰঞ্জাম লৈ এখন গাড়ী গাঁৱত উপস্থিত হৈছিল, তেতিয়া চোৰ বুলি সন্দেহ কৰিছিল গাঁওবাসীয়ে। গাড়ীখন ঘেৰাও কৰি গাড়ীত থকা লোকসকলক মাৰপিট কৰে গাঁওবাসীয়ে। কিন্তু যিসকলক চোৰ বুলি সন্দেহ কৰি মাৰপিট কৰা হৈছিল তেওঁলোক আচলতে গুগলৰ কৰ্মী আছিল। গুগল মেপছৰ এটা জৰীপ কৰিবলৈ গৈছিল তেওঁলোক। পিছত আৰক্ষী আহি উদ্ধাৰ কৰে।
এই চাঞ্চল্যকৰ ঘটনা সংঘটিত হৈছে উত্তৰ প্ৰদেশৰ কানপুৰৰ বীৰহাৰ গাঁৱত। আৰক্ষীৰ তথ্য অনুসৰি বৃহস্পতিবাৰে নিশা গুগলৰ কৰ্মীসকল মানচিত্ৰ জৰীপৰ বাবে গাঁওখনলৈ আহিছিল। তেওঁলোকৰ গাড়ীখনত বিভিন্ন ধৰণৰ সা-সঁজুলি, কেমেৰা আদি বস্তুৰে সজ্জিত আছিল। গভীৰ নিশা গাঁৱত এনে এখন অদ্ভুত গাড়ী প্ৰৱেশ কৰা দেখি গাঁওবাসী সন্দেহত পৰে।
ৰাতিৰ পহৰা দি থকা লোকসকলে গাড়ীখন ঘেৰি ধৰিলে। এনেদৰে গাড়ী ৰখাই গাঁৱৰ ৰাইজে কৰ্মচাৰী কেইজনৰ লগত কাজিয়া আৰম্ভ কৰে। ইয়াৰ পিছতে গাঁওবাসীয়ে গাড়ীৰ পৰা উলিয়াই আনি মাৰপিট কৰে।
ঘটনা সন্দৰ্ভত আৰক্ষীয়ে খবৰ পোৱাত আহি লোককেইজনক উদ্ধাৰ কৰে।
