প্ৰায় ১০-১২ জনীয়া বন্ধুৰ এটা দলে ৰেষ্টুৰেণ্ট এখনলৈ গৈ খাদ্যৰ অৰ্ডাৰ দিলে, য’ত আছিল ভেজ আৰু নন-ভেজ বিৰিয়ানী। ৰেষ্টুৰেণ্টখনৰ বিৰুদ্ধে অভিযোগ কৰা হৈছিল যে, ভেজ বিৰিয়ানীত মাংসৰ হাড় পোৱা গৈছে।
যোৱা ৩১ জুলাইৰ নিশা গোৰখপুৰৰ শাস্ত্ৰী চ’কৰ সমীপৰ কেণ্টনমেণ্ট এলেকাৰ জনপ্ৰিয় ৰেষ্টুৰেণ্ট ‘বিৰিয়ানী বে’ত সংঘটিত হয় এই ঘটনা।
বিল পৰিশোধ কৰি থাকোঁতে মাংসৰ হাড়ক লৈ হুলস্থুলীয়া পৰিবেশৰ সৃষ্টি হয়। ৰেষ্টুৰেণ্টৰ মালিকে দাবী কৰে যে তেওঁলোকৰ পাকঘৰত ভেজ আৰু নন-ভেজ ৰন্ধা সম্পূৰ্ণ পৃথক ব্যৱস্থা আছে। গতিকে নিৰামিষ খাদ্যত হাড় বা আন কোনো নন-ভেজ খাদ্য মিহলি হোৱাৰ কোনো প্ৰশ্নই উত্থাপন নহয়।
তাৰ পৰাই কৰ্তৃপক্ষই সন্দেহ বাঢ়িবলৈ ধৰে। বাক-বিতণ্ডা বাঢ়ি অহাৰ লগে লগে ৰেষ্টুৰেণ্টখনলৈ আৰক্ষী আহে।
চিচিটিভিৰ ফুটেজ পৰীক্ষা কৰাৰ পাছত দলটোৱে নিজেই ভেজ বিৰিয়ানীৰ প্লেটত হাড়ৰ টুকুৰা ৰাখিছিল বুলি জানিব পৰা গৈছে। উদ্দেশ্য স্পষ্ট আছিল, ৫-৬ হাজাৰ টকাৰ বিৰিয়ানী খাই মূল্য পৰিশোধ কৰাৰ পৰা নিজকে বিৰত ৰখা।
এই ভিডিঅ’টো চোৱাৰ পিছতে আৰক্ষীৰ আগত বিষয়টো স্পষ্ট হৈ পৰে। কেণ্টনমেণ্ট আৰক্ষীয়ে জনোৱা মতে, এতিয়ালৈকে কোনেও লিখিত অভিযোগ দাখিল কৰা নাই যদিও আৰক্ষীয়ে বিষয়টো গুৰুত্বসহকাৰে চোৱাচিতা কৰিছে।
