এক ঘন্টাৰ ভিতৰত পাকিস্তান জিন্দাবাদ ধ্বনি দিয়াসকলক গ্ৰেপ্তাৰ কৰি দেখুৱাওঁক : গৌৰৱ গগৈ
‘মুখ্যমন্ত্ৰীক আহ্বান জনাইছো, এক ঘন্টাৰ ভিতৰত পাকিস্তান জিন্দাবাদ ধ্বনি দিয়াসকলক গ্ৰেপ্তাৰ কৰি দেখাওঁক।‘ মুখ্য মন্ত্ৰীক প্ৰত্যাহ্বান জনাই এইদৰে কয় কলিয়াবৰৰ সাংসদ গৌৰৱ গগৈয়ে।
উল্লেখযোগ্য যে, ছ’চিয়েল মিডিয়াত আজমল আৰু সেনা-আৰক্ষীৰ সন্মুখতে পাকিস্তান জিন্দাবাদ কোৱা বুলি এটা ভিডিঅ’ ইতিমধ্যে ভাইৰেল হৈ পৰিছে।
তাৰ বিপৰীতে এআইয়ুডিএফৰ সাধাৰণ সম্পাদক আমিনুল ইছলামে ‘পাকিস্তান জিন্দাবাদ’ দিয়া নাছিল বুলি উল্লেখ কৰাৰ লগতে ‘আজিজ খান জিন্দাবাদ’ দিয়া বুলিহে দাবী কৰে।
কিন্তু এআইয়ুডিএফৰ সম্পূৰ্ণ বিপৰীত স্থিতিত গৌৰৱ গগৈ।
তেওঁ কয় ‘প্ৰকৃত ভাৰতীয়ই পাকিস্তান জিন্দাবাদ নকয়। এই কথাৰ আমি গৰিহণা দিছো।’
‘যদি পাকিস্তান জিন্দাবাদ দিছিল তেন্তে স্থানীয় আৰক্ষীয়ে কি কৰি আছিল? ভিডিঅ’টো ইমানেই ভাইৰেল হৈ গ’ল যদিও কোনো মানুহক এতিয়ালৈকে কিয় গ্ৰেপ্তাৰ কৰিব পৰা নাই? CISF য়ে কি কৰি আছে? চিচি টিভি ফুটেজ এতিয়ালৈকে আৰক্ষীয়ে কিয় উলিওৱা নাই?’ গৌৰৱ গগৈয়ে প্ৰশ্ন কৰি কয়।
যদি স্থানীয় আৰক্ষীয়ে একঘন্টাৰ ভিতৰত গ্ৰেপ্তাৰ কৰিব নোৱাৰে তেন্তে সেই স্থানীয় আৰক্ষী বিষয়াক শীঘ্ৰে নিলম্বন কৰক বুলিও দাবী জনায় গৌৰৱে।
গৌৰৱৰ মতে অন দ্যা স্পট আৰক্ষী সেনা-বাহিনীয়ে পাকিস্তান জিন্দাবাদ কোৱাসকলক ধৰিব লাগিছিল। আৰক্ষীৰ সন্মুখতে পাকিস্তান জিন্দাবাদ দি বিমান বন্দৰৰ পৰা ওলাই যোৱাটো গৃহ বিভাগৰ অন্য এক বিফলতা।‘