ইংলেণ্ডৰ প্ৰাক্তন ক্ৰিকেটাৰ গ্ৰেহাম থৰ্পে চৰম পন্থা বাছি লৈছে বুলি পৰিয়ালৰ লোকে প্ৰকাশ কৰিছে। ১০০খন টেষ্ট আৰু ৮৫খন এদিনীয়া খেল খেলা কিংবদন্তি ক্ৰিকেটাৰগৰাকীৰ যোৱা সপ্তাহত মৃত্যু হয়। থৰ্পেৰ পত্নী আমাণ্ডাই কয় যে প্ৰাক্তন ক্ৰিকেটাৰগৰাকীয়ে উদ্বেগ আৰু হতাশাত ভুগিছিল আৰু তেওঁৰ অবিহনে পৰিয়ালটোৰ অৱস্থা ভাল হ’ব বুলি তেওঁৰ বিশ্বাস আৰু তেওঁৰ মৃত্যু তেওঁলোকৰ বাবে এক ভয়াৱহ আঘাত হিচাপে আহিছিল বুলিও কয়।
গ্ৰেহাম থৰ্পে ১০০খন টেষ্ট আৰু ৮২খন এদিনীয়া খেলিছিল আৰু আন্তঃৰাষ্ট্ৰীয় কেৰিয়াৰত ৯ হাজাৰৰো অধিক ৰান সংগ্ৰহ কৰিছিল। ১৯৯৩ চনৰ পৰা ২০০৫ চনৰ ভিতৰত এই মিডল অৰ্ডাৰ বেটছমেনগৰাকীৰ সৰ্বোচ্চ পৰ্যায়ৰ কেৰিয়াৰ ১৩ বছৰ ধৰি চলিছিল।
আমাণ্ডাই প্ৰকাশ কৰে যে ২০২২ চনত গ্ৰেহাম থৰ্পে নিজৰ প্ৰাণ কাঢ়ি ল’বলৈ চেষ্টা কৰিছিল।ক্ৰিকেটাৰগৰাকীৰ পত্নীয়ে কয় যে পৰিয়ালে থৰ্পেক সুস্থ হৈ উঠাত সহায় কৰিবলৈ যৎপৰোনাস্তি চেষ্টা কৰিছিল যদিও তেওঁলোকৰ কোনো প্ৰচেষ্টাই ফল নাপালে।
উল্লেখযোগ্য যে ২০২২ চনৰ মাৰ্চ মাহত গ্ৰেহাম থৰ্পক আফগানিস্তানৰ পুৰুষ ক্ৰিকেট দলৰ মুখ্য প্ৰশিক্ষক হিচাপে নিযুক্তি দিয়া হৈছিল যদিও স্বাস্থ্যজনিত সমস্যাৰ বাবে তেওঁ এই ভূমিকা গ্ৰহণ কৰিবলৈ সক্ষম হোৱা নাছিল।
