ৰাষ্ট্ৰপতি দ্ৰৌপদী মুৰ্মুৱে কেইবাখনো ৰাজ্যত ৰাজ্যপাল সলনি কৰিছে। ইয়াৰে কেইজনমান ৰাজ্যপালৰ পদত্যাগ গ্ৰহণ কৰা হৈছে আৰু কেইজনমানক আন ৰাজ্যত ৰাজ্যপাল কৰা হৈছে। মহাৰাষ্ট্ৰৰ ৰাজ্যপাল ভগত সিং কোশাৰীৰ পদত্যাগ গ্ৰহণ কৰা হৈছে। ইয়াৰ উপৰিও, কেইবাখনো ৰাজ্যত ডাঙৰ পৰিৱৰ্তন হৈছে।
ৰাজস্থানৰ শীৰ্ষ বিজেপি নেতা গুলাব চান্দ কাটাৰিয়াক অসমৰ ৰাজ্যপাল হিচাপে নিযুক্তি দিয়া হৈছে। একে সময়তে প্ৰাক্তন ন্যায়াধীশ এছ আব্দুল নাজিৰ অন্ধ্ৰ প্ৰদেশৰ ৰাজ্যপাল নিযুক্ত কৰা হৈছে।
বিহাৰৰ ৰাজ্যপাল ফাগু চৌহানক মেঘালয়ৰ ৰাজ্যপাল হিচাপে নিযুক্তি দিয়া হৈছে। সেইদৰে, হিমাচলৰ ৰাজ্যপাল ৰাজেন্দ্ৰ বিশ্বনাথ আৰ্লেকাৰক বিহাৰৰ ৰাজ্যপাল হিচাপে নিযুক্তি দিয়া হৈছে।
লাডাখৰ লেফটেনেণ্ট গভৰ্ণৰ ৰাধা কৃষ্ণ মাথুৰৰ পদত্যাগো গ্ৰহণ কৰা হৈছে। ঝাৰখণ্ডৰ ৰাজ্যপাল ৰমেশ ব্যাসক মহাৰাষ্ট্ৰৰ ৰাজ্যপাল হিচাপে নিযুক্তি দিয়া হৈছে। ইয়াৰ উপৰিও, অৰুণাচল প্ৰদেশৰ ৰাজ্যপাল বিডি মিশ্ৰক লাডাখৰ লেফটেনেণ্ট গভৰ্ণৰ কৰা হৈছে। একে সময়তে, প্ৰাক্তন বিত্ত ৰাজ্য মন্ত্ৰী শিৱ প্ৰতাপ শুক্লাক হিমাচল প্ৰদেশৰ ৰাজ্যপাল হিচাপে নিযুক্তি দিয়া হৈছে।
লেফটেনেণ্ট জেনেৰেল কৈবল্য ত্ৰিবিক্ৰম পৰনায়কক অৰুণাচল প্ৰদেশৰ ৰাজ্যপাল হিচাপে নিযুক্তি দিয়া হৈছে। একে সময়তে, লক্ষ্মণ প্ৰসাদ আচাৰ্যক ছিকিমৰ ৰাজ্যপাল হিচাপে নিযুক্তি দিয়া হৈছে। চিপি ৰাধাকৃষ্ণণক ঝাৰখণ্ডৰ ৰাজ্যপাল হিচাপে নিযুক্তি দিয়া হৈছে। বিশ্ব ভূষণ হৰিচন্দনক ছত্তীশগড়ৰ ৰাজ্যপাল হিচাপে নিযুক্তি দিয়া হৈছে।
ছত্তীশগড়ৰ ৰাজ্যপাল অনুসূয়া উইকীক মণিপুৰৰ ৰাজ্যপাল হিচাপে নিযুক্তি দিয়া হৈছে। মণিপুৰৰ ৰাজ্যপাল এল গণেশনক নাগালেণ্ডৰ ৰাজ্যপাল হিচাপে নিযুক্তি দিয়া হৈছে। ৰাজ্যপালে দায়িত্ব গ্ৰহণ কৰাৰ তাৰিখৰ পৰা এই নিযুক্তিসমূহ কাৰ্যকৰী হ’ব।
আনহাতে, এই পৰিৱৰ্তন আৰু নিযুক্তিৰ বিশেষ দিশটো হ’ল যে অযোধ্যাৰ ৰাম মন্দিৰ গোচৰৰ ওপৰত ৰায় ঘোষণা কৰা প্ৰাক্তন ন্যায়াধীশ আব্দুল নাজিৰক অন্ধ্ৰ প্ৰদেশৰ ৰাজ্যপালৰ দায়িত্ব দিয়া হৈছে।
