সকলোৰে প্ৰধানমন্ত্ৰী নৰেন্দ্ৰ মোডীৰ বিদেশ ভ্ৰমণৰ ওপৰত দৃষ্টি ৰাখে। প্ৰধানমন্ত্ৰীৰ সকলো বিদেশ ভ্ৰমণত এগৰাকী মহিলাই সংগ দিয়া দেখা যায়। বিশেষকৈ তেওঁৰ গুৰুত্বপূৰ্ণ সভাবোৰত এই ভদ্ৰমহিলাগৰাকী সদায় উপস্থিত থাকে। কিন্তু মহিলাগৰাকী কোন? মোডীৰ বিদেশ ভ্ৰমণত তেওঁৰ উপস্থিতি কিয় ইমান অপৰিহাৰ্য? প্ৰায়সকল মানুহৰে মনলৈ এই প্ৰশ্ন আহে।
তেওঁ হৈছে গুৰদ্বীপ কৌৰ চাওলা। জন্মসূত্ৰে ভাৰতীয় যদিও বৰ্তমান আমেৰিকাত বাস কৰে। এইগৰাকী মহিলা এগৰাকী সফল উদ্যোগী। কিন্তু সেয়াই তেওঁৰ একমাত্ৰ পৰিচয় নহয়। দিল্লীৰ ছেইণ্ট ষ্টিফেনছ কলেজৰ পৰা ইংৰাজী সাহিত্যত বি এ আৰু এম এ ডিগ্ৰী লাভ কৰাৰ পিছত ৰাজনীতি বিজ্ঞানত এম এ আৰু পি এইচ ডি কৰে।
এই মহিলাগৰাকীয়ে ভাৰতৰ সংসদৰ লগতে আমেৰিকাৰ বিদেশ মন্ত্ৰালয়ৰ পৰাও বিশেষ প্ৰশিক্ষণ লাভ কৰিছে। ২১ বছৰ বয়সত তেওঁ সংসদত দোভাষী হিচাপে নিযুক্তি লাভ কৰে। অনুবাদ আৰু ব্যাখ্যাৰ ক্ষেত্ৰত তেওঁৰ ৩০ বছৰীয়া অভিজ্ঞতা আছে। আৰু মোদীয়ে তেওঁৰ ভাষণ অনুবাদ কৰাৰ ক্ষেত্ৰত এই অভিজ্ঞ মহিলাগৰাকীক বিশ্বাস কৰি আহিছে। সেয়ে মহিলাগৰাকীক মোডীৰ বিদেশ ভ্ৰমণত লগতে থকা দেখা যায়। আমেৰিকাৰ ৰাষ্ট্ৰপতি বাৰাক ওবামা, ড’নাল্ড ট্ৰাম্প আৰু বৰ্তমানৰ জো বাইডেনৰ সৈতে প্ৰধানমন্ত্ৰীৰ বৈঠকৰ সময়ত তেওঁক দেখা গৈছে।
প্ৰধানমন্ত্ৰী নৰেন্দ্ৰ মোডীৰ বিদেশ ভ্ৰমণ কেৱল দেশৰ বাবেই নহয়, আন্তঃৰাষ্ট্ৰীয় ৰাজনীতি আৰু কূটনীতিৰ বাবেও অতি গুৰুত্বপূৰ্ণ হৈ পৰিছে। শেহতীয়াকৈ আমেৰিকা ভ্ৰমণৰ সময়ত প্ৰধানমন্ত্ৰী মোডীয়ে বৈদেশিক নীতি সন্দৰ্ভত আলোচনা আৰু আমেৰিকাৰ ব্যৱসায়ীসকলৰ সৈতে বৈঠকত মিলিত হয়। তেওঁৰ ভ্ৰমণৰ অন্তত কেইবাটাও আন্তঃৰাষ্ট্ৰীয় সংস্থাই ভাৰতত বৃহৎ বিনিয়োগৰ কথা ঘোষণা কৰে।
এনে আলোচনাবোৰ প্ৰধানমন্ত্ৰীৰ লগত আন কিছুমান বিষয়া আৰু কৰ্মচাৰী থাকে যিয়ে এই কূটনৈতিক সাক্ষাৎকাৰ আৰু আলোচনাত বিশেষ ভূমিকা পালন কৰে। তাৰে এগৰাকী হৈছে এই গুৰদ্বীপ, যিয়ে মোডীৰ ভাষণ হিন্দীৰ পৰা ইংৰাজীলৈ অনুবাদ কৰে।
কেৱল মোডীক নহয়, এই বিষয়ত বহু ৰাজ্যৰ নেতাই তেওঁক বিশ্বাস কৰে। ২০১০ চনত বাৰাক ওবামাৰ প্ৰথম ভাৰত ভ্ৰমণৰ সময়ত গুৰদ্বীপে সংগ দিছিল। ২০১৫ চনত ওবামাৰ গণৰাজ্য দিৱসৰ ভাষণো অনুবাদ কৰিছিল। ভাৰতৰ উপৰি আমেৰিকা আৰু কানাডাৰ কূটনৈতিক মহলত গুৰদ্বীপ কৌৰ চাওলাৰ যথেষ্ট গুৰুত্ব আছে।
