আহমেদাবাদৰ বিমান দুৰ্ঘটনাৰ জোকাৰণি এতিয়াও মাৰ যোৱা নাই। তাৰ মাজতে আন এক ভয়ংকৰ হেলিকপ্টাৰ দুৰ্ঘটনাই জোকাৰি গ’ল কেদাৰনাথক। গৌৰীকুণ্ড আৰু ত্ৰিযুগিনাৰায়ণৰ মাজৰ ঘন অৰণ্যত দুৰ্ঘটনাগ্ৰস্ত হয় এখন হেলিকপ্টাৰ। ৫ জন যাত্ৰীৰ মৃত্যু ঘটিছে আৰু ২ জন সন্ধানহীন হৈছে। এনডিআৰএফ আৰু এছডিআৰএফে উদ্ধাৰ অভিযান আৰম্ভ কৰিছে।
স্থানীয় সূত্ৰৰ পৰা জানিব পৰা মতে, পুৱাৰ ভাগত কেদাৰনাথ ধামৰ সমীপত সংঘটিত হয় এই দুৰ্ঘটনা। হেলিকপ্টাৰখনে গুপ্তকাশী অভিমুখে যাত্ৰা আৰম্ভ কৰিছিল। উত্তৰাখণ্ডৰ আৰিয়ান এভিয়েশনৰ মালিকানাধীন হেলিকপ্টাৰখনে পুৱা প্ৰায় ৫ বজাত উৰা মাৰে। তাত আছিল ৬ জন যাত্ৰী আৰু এজন পাইলট।
কিন্তু উৰণৰ কিছু সময়ৰ পাছতে হেলিকপ্টাৰখনৰ উচ্চতা কমিবলৈ ধৰে। পুৱা ৫:৩০ বজাত গৌৰীকুণ্ড আৰু ত্ৰিযুগিনাৰায়ণৰ মাজৰ গভীৰ অৰণ্যত দুৰ্ঘটনাগ্ৰস্ত হয় হেলিকপ্টাৰখন।
প্ৰথম অৱস্থাত বেয়া বতৰৰ বাবে হেলিকপ্টাৰ দুৰ্ঘটনাগ্ৰস্ত হোৱা বুলি অনুমান কৰা হৈছে। মৃতসকলৰ ভিতৰত এটি শিশুও থকাৰ খবৰ পোৱা গৈছে। সন্ধানহীন হোৱা দুয়োজনক বিচাৰি উলিয়াবলৈ ব্যাপক অনুসন্ধান অব্যাহত আছে।
অৱশ্যে দুৰ্ঘটনাস্থলী অতি দুৰ্গম অঞ্চলত থকাৰ বাবে উদ্ধাৰকাৰী দলটোৱে খোজকাঢ়ি গৈ দুৰ্ঘটনাস্থলীত উপস্থিত হ’বলগীয়া হৈছে, যাৰ বাবে কামত বাধাৰ সৃষ্টি হৈছে বুলি কৰ্তৃপক্ষই জনায়।
